Տեղեկատվություն չենք ստացել ամերիկյան զորքերի դուրսբերման ծրագրերի մասին. «Սիրիայի դեմոկրատական ուժեր»
Քրդերի գլխավորած «Սիրիայի դեմոկրատական ուժերը» (SDF) չորեքշաբթի օրը հայտարարել են, որ խմբավորումը Սիրիայի հյուսիսից և արևելքից ամերիկյան զորքերի դուրսբերման որևէ ծրագիր չի ստացել:
«Իհարկե, ԴԱԻՇ-ը և այլ չարամիտ ուժերը սպասում են ամերիկյան զորքերի դուրսբերման հնարավորությանը, որպեսզի կարողանան վերսկսել իրենց գործունեությունը և հասնել 2014 թվականի մակարդակին», – Reuters-ին ասել է SDF-ի խոսնակ Ֆարհադ Շամին:
ԱՄՆ պաշտպանության նախարարությունը պլաններ է մշակում Սիրիայից ամերիկյան բոլոր զորքերը դուրս բերելու համար, չորեքշաբթի հաղորդում է NBC News-ը՝ հղում անելով ԱՄՆ պաշտպանության երկու պաշտոնյաների:
Միացյալ Նահանգները քրդերի գլխավորած ուժերը համարում է «Իսլամական պետության» դեմ պայքարում հիմնական դաշնակիցներ, սակայն հարևան Թուրքիան դրանք դիտարկում է որպես սպառնալիք իր ազգային անվտանգությանը:
