Թե ինչո՞ւ Երևանը չի ուղարկում համապատասխան նյութերը Կապանում ՌԴ գլխավոր հյուպատոսության բացման համար` չգիտենք. Զախարովա
ՌԴ ԱԳՆ պաշտոնական ներկայացուցիչ Մարիա Զախարովան նոյեմբերի 27-ին ճեպազրույցում մեկնաբանել է ՀՀ Սյունիքի մարզի Կապան քաղաքում ՌԴ գլխավոր հյուպատոսության բացման հետաձգման պատճառներին վերաբերող լրագրողի հարցը։
«Մենք բազմիցս մեկնաբանել ենք այս հարցը։ Ցավոք, իրավիճակը չի փոխվել։ Հայկական կողմը սկզբունքային համաձայնություն է տվել Սյունիքի մարզի Կապան քաղաքում ՌԴ գլխավոր հյուպատոսության բացմանը։ Ըստ այդմ, ռուսական կողմը գլխավոր հյուպատոսի էկզեկվատուր է պահանջել, կամ, պարզ ասած՝ պաշտոնական ճանաչում։
Ըստ այդմ՝ սպասում ենք արձագանքի։ Թե ինչու և որոնք են հայկական կողմից՝ մեզ համապատասխան պատասխան նյութեր չուղարկելու պատճառները, դա ոչ թե մեզ, այլ Երևանին ուղղվելի հարցն է»,-հայտարարել է ՌԴ ԱԳՆ պաշտոնական ներկայացուցիչը։
