Թբիլիսիում կրկին հանրահավաք է անցկացվում՝ ընդդեմ խորհրդարանական ընտրությունների արդյունքների
Թբիլիսիում հանրահավաք է անցկացվում ընդդեմ հոկտեմբերի 26-ին կայացած խորհրդարանական ընտրությունների արդյունքների: Ինչպես հայտնում է ՏԱՍՍ-ը, հանրահավաքից առաջ ընդդիմության ներկայացուցիչները երթ են կազմակերպել Թբիլիսիի երկաթուղային կայարանի շենքից դեպի խորհրդարան։
Ըստ աղբյուրի՝ Վրաստանի օրենսդիր մարմնի շենքի մոտ հերթապահություն են իրականացնում ոստիկանության ջոկատները։ Ռուսթավելի պողոտայում, որտեղ գտնվում է խորհրդարանը, ավտոմեքենաների երթևեկությունն արգելված է։
Ավելի վաղ՝ Վրաստանում խորհրդարանական ընտրությունների քվեաթերթիկների մասնակի վերահաշվարկը հաստատել է իշխող «Վրացական երազանք» կուսակցության հաղթանակը։ Երկրի ԿԸՀ-ն այդ կապակցությամբ հայտարարություն է տարածել, որի նշվել է, որ ընտրատեղամասերի 12 տոկոսում, որտեղ քվեարկել է ընտրողների 14 %-ը, քվեաթերթիկների վերահաշվարկն ավելի վաղ հայտարարված պաշտոնական արդյունքների էական փոփոխության չի հանգեցրել։ Վրաստանի ԿԸՀ-ի տվյալներով՝ խորհրդարանական ընտրությունների արդյունքներով իշխող «Վրացական երազանք» կուսակցությունն ստացել է ձայների 53,9 %-ը, սակայն ընդդիմությունը չի ընդունում այս արդյունքները։
Հանրապետության նախագահ Սալոմե Զուրաբիշվիլին ընտրությունները որակել է ամբողջական կեղծիք և հայտարարել, որ չի ճանաչում դրանք, իսկ 5 %-ի շեմը հաղթահարած բոլոր չորս ընդդիմադիր կուսակցությունները հայտարարել են, որ բոյկոտելու են նոր խորհրդարանը։
