Շվեդիան Ուկրաինային 63 մլն եվրոյի օգնություն կհատկացնի

Շվեդիայի կառավարությունն Ուկրաինային 63 միլիոն եվրո կհատկացնի, որը կուղղվի երկրի պաշտպանական արդյունաբերության աջակցությանն ու զինված ուժերի կարիքներին:

Այս մասին հայտնել է Շվեդիայի պաշտպանության նախարարությունը։Ըստ գերատեսչության՝ այդ միջոցներից 20 միլիոնը պլանավորված է «Ուկրաինայի արդյունաբերական բազայի աջակցության համար», 43 միլիոնը՝ «որպես ֆինանսական աջակցություն մի շարք բազմակողմ նախաձեռնություններին՝ Ուկրաինայի զինված ուժերին արագ և արդյունավետ աջակցություն ցուցաբերելու նպատակով»։

Հաղորդագրության մեջ նշվում է, որ օգնությունն ուկրաինական արդյունաբերական բազային լրացուցիչ հնարավորություններ կբացի ուկրաինական և եվրոպական պաշտպանական ձեռնարկությունների համագործակցության համար, նորարարական լուծումների համատեղ մշակման համար, որոնք անմիջականորեն փորձարկվել են ռազմի դաշտում, ինչպես նաև պաշտպանական տեխնիկայի արտադրության և սպասարկման ոլորտում Ուկրաինայի ներուժի մեծացման համար։

43 միլիոն եվրոյի օգնությունը նախատեսում է «օդ-օդ» դասի հրթիռների գնում F-16 կործանիչների օգտագործման ուկրաինական ծրագրի համար, ուկրաինական ծովային հետևակայինների ուսուցում, ականազերծման սարքավորումների և կապի միջոցների մատակարարումներ։