Պեկինը և Վաշինգտոնը քննարկել են պետությունների ղեկավարների միջև փոխգործակցությունը
Չինաստանի արտաքին գործերի նախարար Վան Ին ԱՄՆ ազգային անվտանգության հարցերով խորհրդական Ջեյք Սալիվանի հետ քննարկել է երկու երկրների ղեկավարների միջև փոխգործակցության նոր փուլը։
Այս մասին հաղորդում է չինական Global Times պարբերականը։Ինչպես նշում է հրատարակությունը, Վան Ին Սալիվանի հետ անցկացրել է «անկեղծ, առարկայական և կառուցողական չին-ամերիկյան ռազմավարական բանակցություններ»։
Կողմերը քննարկել են «մոտ ապագայում երկու պետությունների ղեկավարների միջև փոխգործակցության նոր փուլը»։
Չինացի փորձագետները կարծում են, որ Պեկինի և Վաշինգտոնի միջև ռազմավարական շփումների պահպանումը «կարևոր նշանակություն ունի ընթացիկ երկկողմ հարաբերությունների արդյունավետ կառավարման համար և օգնում է ԱՄՆ-ին ճիշտ պատկերացում կազմել Չինաստանի մասին»:
Ըստ Չինաստանի արտգործնախարարության տարածած հաղորդագրության՝ Վան Ին հայտարարել է, որ Չինաստան-ԱՄՆ հարաբերությունները լի են շրջադարձերով, և կողմերը պետք է ճիշտ ուղի գտնեն, որպեսզի երկու մեծ տերությունները կարողանան գոյակցել։
Ըստ Սպիտակ տան հայտարարության՝ օգոստոսի 27-ին տեղի Ջեյք Սալիվանը և Վան Ին անցկացրել են «անկեղծ, առարկայական և կառուցողական» քննարկումներ երկկողմ, տարածաշրջանային և գլոբալ հարցերի շուրջ։ Իսկ օգոստոսի 29-ին Սալիվանը հանդիպել է Չինաստանի կենտրոնական ռազմական խորհրդի փոխնախագահ Չժան Յուսիայի հետ։
Ըստ Սպիտակ տան հաղորդագրության՝ կողմերը վերահաստատել են երկու երկրների ռազմական գերատեսչությունների միջև կանոնավոր հաղորդակցության կարևորությունը։
