Վրաստանում հետագա զարգացումները կախված են Ադրբեջան-Հայաստան-Թուրքիա երթուղուց. Հակոբ Բադալյան
Հակոբ Բադալյանը տելեգրամյան իր ալիքում գրում է. «Հոկտեմբերին Վրաստանի խորհրդարանի ընտրությունը շատ կարևոր նշանակություն կունենա Կովկասի համար: Ավելին, այդ ընտրության արդյունքը ավելի մեծ նշանակություն կունենա Կովկասի համար, քան նոյեմբերին կայանալիք ԱՄՆ նախագահի ընտրությունը: Սա ասում եմ մի փոքր հարաբերականությամբ, որովհետև, մեծ հաշվով, ԱՄՆ դիրքորոշումն է լինելու Վրաստանում իրադարձությունների առանցքային կատալիզատորներից մեկը, հետևաբար, կախված դիրքորոշումից, ձևավորվելու է նաև քաղաքական արդյունքը:
Այդ իմաստով, վերստին ուշադրություն եմ հրավիրում Ջեյմս Օ՛Բրայանի այն հայտարարությանը, որ արել էր Կոնգրեսում՝ Միջին միջանցքի հետ կապված: Օ՛Բրայանը ասել էր, որ կա Վրաստանի ճանապարհը, սակայն իրենք Միջին միջանցքի հիմնական երթուղի դիտարկում են Ադրբեջան-Հայաստան-Թուրքիան:
Սա ունի մի քանի պատճառահետևանքային շերտ: Եվ այստեղ հարց կարող ենք տալ՝ արդյո՞ք դրանցից մեկն էլ այն չէ, որ ԱՄՆ-ն կա՛մ դիտարկում է Վրաստանի «կորուստը», կա՛մ տևական անկայունությունը:
Հետևաբար, այստեղից կարող ենք եզրակացնել, որ Վրաստանում խորհրդարանի ընտրության միջավայրն ու հետագա զարգացումները կախված են նաև այն հանգամանքից, թե որքան մոտ կարող է լինել Ադրբեջան-Հայաստան-Թուրքիա երթուղին:
Այստեղ է նաև Պուտինի՝ Բաքու այցի նպատակներից և Ալիևի ակնկալիքներից առանցքայինը՝ չպայմանավորվել այդ երթուղու հարցում, չընդունել ԱՄՆ առաջարկները, որովհետև այդ երթուղու բացակայությունը լինելու է Վրաստանի հարցում ԱՄՆ-ին կաշկանդող գործոն՝ հաշվի առնելով, որ այդ պարագայում Վրաստանում անկայունությունը կփակի Միջին միջանցքի նույնիսկ այդ «երակը», ինչը կլինի լուրջ խնդիր Եվրոպայի համար»:
