ԱՄՆ օգնության դադարեցումը չի ազդի պետության գործունեության վրա. Վրաստանի խորհրդարանի նախագահ
ԱՄՆ-ի սառեցված օգնությունը կապված չէր Վրաստանի պետական բյուջեի հետ, լրագրողներին ասել է երկրի խորհրդարանի խոսնակ Շալվա Պապուաշվիլին։
Նրա խոսքով՝ օգնության դադարեցումը ոչ մի կերպ չի ազդի պետության գործունեության վրա։
«Այդ գումարն իսկապես բյուջեում ներառված չի եղել: Մենք այլ պետության կողմից սուբսիդավորվող հետամնաց երկիր չենք»,- հայտարարել է խորհրդարանի նախագահը։
ԱՄՆ պետքարտուղար Էնթոնի Բլինքենը հուլիսի 31-ին հայտարարել է, որ Վաշինգտոնը դադարեցնում է Վրաստանին ավելի քան 95 միլիոն դոլարի չափով օգնության ծրագիրը։ Որոշման պատճառ են դարձել «հակաժողովրդավարական գործողությունները և Վրաստանի կառավարության կեղծ հայտարարությունները, որոնք չեն համապատասխանում ԵՄ-ին և ՆԱՏՕ-ին անդամակցության չափանիշներին»։
Նույն պատճառով ԵՄ-ն ավելի վաղ որոշել է սառեցնել 30 միլիոն եվրոն, որը նախատեսվում էր հատկացնել Վրաստանի պաշտպանության նախարարությանը։
«Օտարերկրյա գործակալների մասին» օրենքը վտանգի տակ է դրել Վրաստանի Եվրամիությանն անդամակցելու ձգտումները: Չնայած միջազգային գործընկերների կոչերին, երկրում բողոքի ցույցերին, Վրաստանի խորհրդարանը հաղթահարեց նախագահ Սալոմե Զուրաբիշվիլիի վետոն և հունիսին ընդունեց օրենքը։
