Կոնվերս Բանկը Հայաստանում նորարարության առաջնագծում․ Անդրանիկ Գրիգորյան
![](https://168.am/wp-content/uploads/2024/07/GAR_1097.jpg)
Օրերս հեղինակավոր Global Finance հարթակում հրապարակվեց Կոնվերս Բանկի Գլխավոր գործադիր տնօրեն, Տնօրինության նախագահ Անդրանիկ Գրիգորյանի հետ հարցազրույցը, որում անդրադարձ է կատարվում Բանկի թվային օրակարգին, տարբեր տարիների ներդրված նորարար, թվային լուծումներին ու ծառայություններին, թվային փոխակերպման մարտահրավերներին ու ակնկալիքներին: Ձեզ ենք ներկայացնում հոդվածի հայերեն՝ ավելի ընդգրկուն տարբերակը:
-Որո՞նք են այն հիմնական նորարարությունները, որոնք բնութագրել են Կոնվերս Բանկն իր 30-ամյա պատմության ընթացքում:
-Գործունեության 30 տարիներին Կոնվերս Բանկը բազմիցս հանդես է եկել որպես trandmaker Հայաստանի ֆինանսական շուկայում: Լինելով անկախացումից հետո Հայաստանում արտասահմանյան կապիտալով հիմնադրված առաջին բանկը, գործունեության առաջին իսկ օրերին որդեգրել է հաճախորդների հետ թափանցիկ ու փոխվստահության վրա հիմնված աշխատաոճ, կիրառել և կիրառում է ժամանակի լավագույն համաշխարհային ֆինանսական փորձառությունը:
Բիզնես գործընթացները կառուցելով գիտելիքի և հաճախորդների փորձառության վրա՝ Կոնվերս Բանկը պարբերաբար զարգացնում է Մոբայլ հավելվածը, արդեն իսկ ավտոմատացվել է Օժանդակող գրասենյակի աշխատանքը, մեկնարկել է Զանգերի կենտրոնի զարգացման նախագիծը…
Բանկը հանդես է եկել նորարար լուծումներով ու առաջարկներով, որոնք մեծապես ազդել են բանկային համակարգի հետագա զարգացման վրա: Բանկն առաջինն էր, որը 2014-ին գործարկեց mConverse մոբայլ հավելվածը ֆիզիկական անձանց համար: Միաժամանակ գործարկվեց մոբայլ հավելված իրավաբանական անձանց համար և հանրությանը ներկայացվեց թվային քարտը:
Եվս մեկ նախագիծ, որին կցանկանայի անդրադառնալ այս տեսանկյունից՝ Կոնվերս Միավորներն է: Այն ներդրվել է ավելի քան տասը տարի առաջ, երբ անկանխիկ գործառնությունները նորություն էին, և դրանք խրախուսելու կարիք կար: Կոնվերս Միավորները մի կողմից դարձավ անկանխիկ վճարումների խրախուսման հիանալի գործիք, մյուս կողմից՝ ՀՀ բանկային համակարգում հաճախորդների խրախուսման ամենաերկարամյա նախագիծը, որը հնարավորություն է տալիս յուրաքանչյուր անկանխիկ գործարքից կուտակել միավորներ և դրանք փոխանակել նվերներով:
-Որո՞նք են Բանկի թվային առաջնահերթությունները, և ինչպե՞ս եք վերաբերվում բանկային ծառայությունների թվայնացման միտումին:
-Թվայնացումը պահանջարկ է. հաճախորդի պահանջն է տարբեր ծառայություններ մատուցող ընկերություններից, այդ թվում՝ բանկերից, ստեղծել, ներդնել և զարգացնել թվային գործիքակազմ, որը կհեշտացնի կյանքը, կօգնի առանց հավելյալ ջանքերի ստանալ որակյալ ծառայություններ, տնօրինել ֆինանսական միջոցները՝ առանց բանկ այցելելու: Մյուս կողմից, դա բիզնես առաջարկ է, ներդրված թվային հարթակներ, պրոդուկտներ ու ծառայություններ, որոնց շնորհիվ մեծանում է բանկի բիզնես գործընթացների արդյունավետությունը:
Թվայնացումը կարևորագույն գործիք է բանկային ծառայությունների առաջարկի և արդյունավետության բարձրացման տեսանկյունից: Հաճախորդների պահանջարկին համապատասխանող որակյալ բանկային ծառայությունների մատուցման նկատառումով բանկերը, այդ թվում՝ Կոնվերս Բանկը ձգտում է զարգացման, թվային նոր լուծումների մշակման ու ներդրման, կիբերանվտանգության ապահովման ուղղությամբ ջանքերի ակտիվացման։
Այսօր մենք աշխատում ենք այն գործիքների, թվային լուծումների մշակման ուղղությամբ, որոնք, կարծում եմ, կգոհացնեն անգամ ամենախստապահանջ հաճախորդներին՝ թե ֆիզիկական անձ, թե իրավաբանական անձ: Որպես առաջնահերթություն է դիտարկվում հաճախորդի հիմնական պահանջմունքների բավարարմանն ուղղված գործիքակազմը թվային հարթակներում:
-Կոնվերս Բանկի ո՞ր պրոդուկներն ու ծառայություններն են ներկայում թվային փոխակերպում անցնում, և ո՞րն է հետագա զարգացման տեսլականը:
-Ամենակարևոր և խոշոր նախագիծը, որն այսօր իրականացնում ենք, բիզնես պրոցեսների ավտոմատացումն է: Ներկա պահին թվանայնացվում է վարկային հոսքագիծը, ստեղծվում է թվային արխիվը:
Այս փորձառության հիման վրա հետագայում կավտոմատացվեն նաև Բանկի այլ բիզնես գործընթացներ։ Բիզնես պրոցեսների արագացման շնորհիվ հաճախորդները կխնայեն ժամանակ, կկարողանան ստանալ որակյալ սպասարկում հնարավորինս սեղմ ժամկետում, կապահովվի որոշումների ընդունման օբյեկտիվություն, պրոցեսների առավելագույն անվտանգություն: Շուտով բանկ այցելելու անհրաժեշտություն չի լինի․ մոբայլ բանկինգը կդառնա հաճախորդի հիմնական ֆինանսական խորհրդատուն, նաև միջավայր, առցանց տիրույթ, որտեղ կիրականացվեն բանկային առօրյա գործառնությունները:
Բացի վերը նշված խոշոր նախագիծը, վերջերս հայտարարեցինք կենսաչափական նույնականացման՝ անվտանգության ամենաբարձր չափանիշների համապատասխանող համակարգի ներդրման և Մոբայլ հավելվածով նույնականացում անցնելով՝ Բանկի հաճախորդ դառնալու հնարավորության մասին:
Հավելվածում՝ բանկային ծառայությունների փաթեթներով մենք ներդրեցինք բանկային ծառայությունների բաժանորդագրության սկզբունքը, որը շարունակելու ենք զարգացնել նաև հետագայում: Բաժանորդագրվելով բանկային ծառայությունների փաթեթներից որևէ մեկին՝ առանց Բանկ այցելելու, հաճախորդը կարող է բացել հաշիվներ, պատվիրել քարտեր և, կախված փաթեթից, որոշ բանկային ծառայություններից օգտվել արտոնյալ պայմաններով, ստանալ եկամուտ դրական մնացորդից և այլն:
Քայլեր են ձեռնարկվում թվային նոր գործիքների ներդրման ուղղությամբ. դրանցից կառանձնացնեի հավելվածում քարտի PIN կոդի փոփոխության և Card to cash՝ առանց վճարային քարտի կանխիկացման հնարավորությունները:
Թվային ակտիվ վերափոխում են ապրում նաև բիզնես հաճախորդներին առաջարկվող պրոդուկտները։ Բանկը հայտարարեց Հայաստանի ֆինանսական շուկայում նախադեպը չունեցող արժույթի փոխարկման հարթակի գործարկման մասին: Հարթակում գնանշվում են նաև դրամային բոլոր զույգերը, դրա շահառու հաճախորդները հնարավորություն ունեն արտոնյալ պայմաններով փոխարկում կատարել շուրջ 35 արժութային զույգերով, կատարել փոխարժեքի գնանշման հարցում, ներկայացնել փոխարկման պատվեր, տեղեկատվություն ստանալ արժութային շուկայում spot գների վերաբերյալ:
Converse Markets հարթակի հնարավորությունները հետզհետե կընդլայնվեն՝ ներառելով ֆինանսական շուկայի նոր գործիքներ և ընդգրկելով հաճախորդների ավելի լայն շրջանակ:
-Ի՞նչ մարտահրավերների եք բախվում թվային փոխակերպման ընթացքում:
-Նոր տեխնոլոգիաների յուրացման և ներդրման ընթացքում գործընթացների անխափանությունն ու անվտանգությունն ապահովելու համար հարկավոր են մի քանի նախապայմաններ՝ պրոֆեսիոնալ թիմ, համագործակցված աշխատանք, ադապտիվից ավտոմատ բիզնես գործընթացի անցման ժամանակ ռիսկերի ճիշտ գնահատում, կանխարգելում կամ արագ արձագանք, զսպման միջոցառումներ:
Թվային փոխակերպման գործընթացում մեր ուշադրության կենտրոնում է նաև թիմի տրամադրվածությունը: Ցանկացած նորություն՝ առավել ևս թվայնացումը, ողջ աշխարհում մարդկանց մոտ առաջացնում է աշխատանքից զրկվելու մտահոգություն, այնինչ դա նոր մասնագիտություն ձեռքբերելու, վերապրոֆիլավորվելու և այլ հաստիքում կայանալու, նոր հմտություններ, նոր մասնագիտական որակավորում ստանալու հնարավորություն է:
Այս փորձառությունը մենք հաջողությամբ կիրառում ենք այսօր:
-Որո՞նք են Converse Mobile հավելվածի հիմնական առանձնահատկությունները, և ինչպե՞ս է հավելվածը ծառայում հաճախորդների զարգացող կարիքներին:
-Մեզ համար կարևոր է, որ մոբայլ բանկինգում ներկայացված լինեն և հասանելի լինեն առաջին անհրաժեշտության բանկային բոլոր ծառայությունները՝ հաշիվներ, քարտեր, վարկավորում, ներդրումներ, փոխանցումներ ու վճարումներ…
Այսօր մենք ոչ միայն ներկայանում ենք Converse Mobile հավելվածի լայն գործիքակազմով, այլև ապահովում ենք մոբայլ բանկինգի անընդհատ զարգացումը, ինչի հիմքում շուկայի ուսումնասիրությունն է և հաճախորդների կարիքները; Մենք գնահատում ենք դրանք, չենք անտեսում ոչ մի արձագանք, կարծիք ու առաջարկ և պարբերաբար համալրում ենք հավելվածի գործիքակազմը՝ հաճախորդների աճող ու փոփոխվող պահանջմունքներն առավելագույնս բավարերելու համար: Առաջիկայում Կոնվերս Բանկն իր հաճախորդներին կներկայանա ամբողջապես թարմացված, նոր, ավելի ընդգրկուն ֆունկցիոնալով Converse Mobile հավելվածով:
-Ինչպե՞ս եք մտադիր հետագայում զարգացնել Կոնվերս Բանկի թվային միջավայրը, բանկային առաջարկները:
-Մենք մտադիր ենք թե ֆիզիկական անձանց և թե իրավաբանական անձանց տալ թվային միջավայրում բանկային ծառայությունների հնարավորինս լայն՝ նրանց պահանջմունքներին առավելագույնս համապատասխանող գործիքակազմ, ավտոմատացնել բիզնես գործընթացները, տրամադրել բարձրակարգ խորհրդատվություն և հաճախորդների բանկային փորձառությունը տեղափոխել թվային հարթակներ՝ ապահովելով անվտանգ և ընդգրկուն միջավայր, իսկ միջնաժամկետ կտրվածքում դառնալ հաճախորդի ամենօրյա ընկերը, գործընկերը, խորհրդատուն ոչ միայն ֆինանսական հարցերում:
Մարդիկ Բանկի մասնաճյուղեր պիտի այցելեն միայն տեխնիկական խնդիրների լուծումը ստանալու նպատակով, իսկ մեր աշխատակիցները պիտի դառնան նրանց ընկերն ու ուղեկիցը ֆինանսական ողջ փորձառության ընթացքում: