Վստահ եմ՝ ԱՄՆ-ը կարող է այս հումանիտար բնույթի հարցի ուղղությամբ մեծ ջանքեր ներդնել ու հասնել արդյունքի. Արցախի ՄԻՊ
2020 թվականի Արցախի 44-օրյա պատերազմից հետո 150 հազարից ավելի արցախահայերի համար ողբերգությունը շարունակվում է առ այսօր: Oկուպացված Արցախ, կորցրած հայրենիք, գերության մեջ մնացած հարազատների շիրիմներ ու անհետ կորածներ, ցավը, որը որևէ կերպ չեն կարողանում մեղմել։ Անհետ կորածների հարազատներն իրենց քունը կորցրած՝ թակում են հայաստանյան պետական ու հասարակական կազմակերպությունների դռները՝ մի լուր իմանան իրենց հարազատների մասին։ Զոհվածների հարազատները խնդրում, պահանջում են, որ ՀՀ իշխանությունները բանակցեն թշնամու հետ՝ 2023 թվականի սեպտեմբերին Ադրբեջանի սանձազերծած ռազմական գործողությունների հետևանքով զոհված ու Արցախում հուղարկավորված իրենց հարազատներին արտաշիրմում անեն ու տեղափոխեն Հայաստան։ Այս պահանջով արցախահայերն օրերս հավաքվել էին Կառավարության շենքի մոտ՝ իրենց պահանջը ներկայացնելու Նիկոլ Փաշինյանին, մի քանի ժամ Կառավարության շենքի մոտ սպասելուց հետո, այդպես էլ նրանց ներսից որևէ մեկը չընդունեց։
2023 թվականի սեպտեմբերի 19-ին՝ Ադրբեջանի սանձազերծած ռազմական գործողությունների, իսկ սեպտեմբերի 25-ին՝ Ասկերանում բենզինի պայթյունի հետևանքով զոհվածների ու անհետ կորածների հարազատները լրագրողների հետ զրույցում ասացին՝ դիմել են ՀՀ-ում միջազգային տարբեր կազմակերպությունների, ՀՀ տարբեր պետական մարմինների։
168.am-ի հետ զրույցում Արցախի մարդու իրավունքների պաշտպան Գեղամ Ստեփանյանը խոսելով արցախահայերի այս պահանջի մասին և ապա պատասխանելով հարցին, թե միջազգային հանրությունը կարո՞ղ է որևէ արդյունավետ քայլ իրականացնել և հնարավորության դեպքում հարցին դրական լուծում տալ, ասաց.
«Կարծում եմ՝ միջազգային հանրությունը կարող է և պետք է դա անի։ Այս հարցերով, նաև հարազատների անունից մի քանի անգամ արդեն տարբեր դեսպանություններ և ՀՀ պատկան մարմիններ նամակներ եմ հղել։ Կան դեսպանություններ, որ արձագանքել են, կան, որ ընդհանրապես չեն արձագանքել։ Արձագանքներն այնպես են եղել, որ հանդիպումներ են նշանակել, քննարկել են, խոսել են այդ գործում իրենց լիազորությունների կամ կարողությունների մասին»։
Արցախի ՄԻՊ-ը հիշեցրեց, որ օրերս Հայաստանում էր ԱՄՆ Միջազգային զարգացման գործակալության ղեկավար Սամանթա Փաուերը, որն անդրադարձել է նաև նմանատիպ հարցերի՝ նշելով, որ մարդիկ չեն կարողանում այցելել իրենց հարազատների շիրիմներին։
«Վստահ եմ՝ Միացյալ Նահանգները շատ հանգիստ կարող է այս հումանիտար բնույթի հարցի ուղղությամբ մեծ ջանքեր ներդնել ու հասնել արդյունքի։ Բայց արդյո՞ք ներդրվում են համապատասխան ուշադրություն ու ջանքեր, սա է ամենակարևոր հարցերից մեկը։ Մենք այս ուղղությամբ հնարավորինս պետք է աշխատենք, որպեսզի միջազգային հանրության տարբեր դերակատարներ ոչ թե խնդրի մասին լսեն ու անցնեն առաջ, այլ իսկապես շատ մեծ ուշադրություն դարձնեն հումանիտար հարցերին, սա էլ հո քաղաքական հա՞րց չէ։ Սրանք բացարձակ հումանիտար բնույթ ունեցող հարցեր են, որոնցում կոնկրետ միջազգային դերակատարները, ոչ միայն տարբեր պետություններ, այլև նույն ՄԱԿ-ը, Եվրոպայի խորհուրդը և այլ կառույցներ, որոնք առնչություն ունեն մարդու իրավունքների հետ, պետք է իրենց ներդրումն ունենան»,- եզրափակեց Գեղամ Ստեփանյանը։
Նշենք, որ երեկ 168.am-ի հետ զրույցում Կարմիր խաչի միջազգային կոմիտեի հայաստանյան գրասենյակի հաղորդակցության ծրագրերի պատասխանատու Զառա Ամատունին ևս անդրադարձել էր արցախահայերի այս պահանջին, շեշտելով, որ Կարմիր խաչը ոչինչ չի կարող անել, եթե չլինի պայմանավորվածություն կողմերի հետ։
