Որ տարիքից են երեխաները սկսում երազներ տեսնել
Ակտիվ քնի փուլը, որի ժամանակ մարդիկ երազ են տեսնում, մեծահասակների մոտ զբաղեցնում է ընդհանուր քնի ժամանակի 10-20%-ը: Նորածինների մոտ այն հասնում է ընդհանուր քնի ժամանակի 80%-ին, չորս ամսականում՝ 40%-ի, իսկ երեք տարեկանում՝ արդեն 30%-ի։ Հաշվի առնելով սա՝ կարելի է ենթադրել, որ երեխաները պետք է շատ երազներ տեսնեն, բայց ամեն ինչ այդքան էլ պարզ չէ։ Այս մասին Gazeta.Ru-ի հոդվածում խոսել է նյարդաբան, սոմնոլոգ Նատալյա Կոնշինան։
«Երեխաները, ամենայն հավանականությամբ, տեսնում են տարբեր պատկերներ քնի ժամանակ, որոնք ուղեկցվում են դեմքի արտահայտությունների և շարժիչ ակտիվության փոփոխություններով: Այնուամենայնիվ, լիարժեք սյուժետային երազները սկսում են ձևավորվել ավելի ուշ ՝ չորս տարեկանից»,– ըստ shantnews-ի՝ ասել է Նատալյա Կոնշինան:
Ըստ սոմնոլոգի, չնայած այն հանգամանքին, որ երեխաները սկսում են բարդ սյուժետային երազներ տեսնել չորս տարեկանից, երազներում վախերն ու մղձավանջները կարող են առաջանալ 1,5 տարեկանից։
«Հիմնական պատճառը երեխայի նյարդային համակարգի լարվածության բարձրացումն է։ Գիշերային վախերի առաջացման գագաթնակետը ցերեկային քնից հրաժարվելու ժամանակն է։ Երեխան հոգնում է երկար արթուն լինելուց, ծանրաբեռնված է քնի ռիթմերը կարգավորող համակարգը, ինչը կարող է վախեր առաջացնել»,- պարզաբանել է մանկական նյարդաբանը։
Մասնագետը հավելել է, որ գիշերային սարսափներն ու մղձավանջները տարբեր վիճակներ են, որոնք առնչություն ունեն քնի գործընթացի հետ կապված պարասոմնիայի հետ:
