Վրաստանի նախագահը վետո դրեց
Վրաստանի նախագահը վետո է դրել խորհրդարանի ընդունած օրենքի վրա, ըստ որի` վերանում են կանանց համար նախատեսված քվոտաները։ Այս տեղեկությունը տարածել է Վրաստանի նախագահի աշխատակազմը: Այս մասին գրում է aliq.ge-ն։
«Գենդերային քվոտաների վերացումը ևս մեկ հետընթաց է Վրաստանի եվրաինտեգրման ճանապարհին, քանի որ գենդերային քվոտաների հարցը Եվրահանձնաժողովի 12 կետից բաղկացած ծրագրի 9-րդ կետի մաս էր կազմում, որը Եվրահանձնաժողովը համարեց կատարված»,- նշված է հայտարարության մեջ:
Նախագահի վետոյից հետո փաստաթուղթը կվերադարձվի խորհրդարանի քննարկմանը: Իշխող կուսակցությունը բավարար ձայներ ունի Վրաստանի նախագահի վետոն հաղթահարելու համար։
Նշենք, որ 2020 թվականին Վրաստանի խորհրդարանն ընդունեց քվոտավորման մեխանիզմը՝ որպես քաղաքականության մեջ արագ և արդյունավետորեն կանանց ներգրավման միջոց։ 2021 թվականի ՏԻՄ ընտրություններում քվոտավորման մասին օրենսգիրքը փոփոխվեց, համամասնական ցուցակում ամեն երկրորդ հակառակ սեռի ներկայացուցիչ ընդգրկելու մեխանիզմը փոխարինվեց ամեն երրորդի, այսինքն՝ ՏԻՄ ընտրությունների ժամանակ համամասնական ցուցակի ամեն 3-րդ թեկնածու պիտի լիներ հակառակ սեռի ներկայացուցիչ, այս դեպքում՝ կին։
2021 թվականին նաև առաջ քաշվեց փակ մեխանիզմ, ինչը նշանակում է, որ կին թեկնածուն չէր կարող փոխարինվել տղամարդ թեկնածուով: Այն ուժը, որը հրաժարվում էր կին թեկնածուի տրամադրել իր մանդատը, զրկվում էր մանդատից:
Վրաստանում խորհրդարանական ընտրությունները տեղի կունենան 2024 թվականի հոկտեմբերի 26-ին։ Պատգամավորները կընտրվեն միայն համամասնական ընտրակարգով: Խորհրդարանի պատգամավորների մանդատները կբաշխվեն 5 տոկոսի շեմը հաղթահարած քաղաքական կուսակցությունների միջև։
