Կանայք շատ ավելի հաճախ են ունենում միգրեն․ որն է պատճառը
Կանայք շատ ավելի հաճախ են ունենում միգրեն, քան տղամարդիկ, քանի որ դրանք կապված են սեռական հորմոնների մակարդակի տատանումների հետ, ասել է նյարդաբան Լյուբով Նեկրասովան։ Նրա խոսքերը մեջբերում է Life-ը։
Կանանց հակվածությունը միգրենի նկատմամբ, ըստ Նեկրասովայի, դեպքերի 70 տոկոսում կապված է դաշտանային ցիկլի հետ. պատճառն էստրոգենի նվազումն է դրա գագաթնակետից հետո:
«Նեյրոհաղորդիչ սերոտոնինը կարևոր դեր է խաղում միգրենի նոպաների զարգացման մեխանիզմում։ Էստրոգենի գագաթնակետի ժամանակ սերոտոնինի մակարդակը միաժամանակ բարձրանում է, իսկ երբ էստրոգենը կտրուկ նվազում է, սերոտոնինը նույնպես կտրուկ նվազում է»,- ըստ shantnews-ի՝ բացատրել է նա:
Նման անկումը ուղեղում առաջացնում է ռեակցիաների տատանում՝ հանգեցնելով նոպայի, և մեծացնում է ցավի ընկալիչների զգայունությունը, հավելել է բժիշկը։
Նյարդաբանը էստրոգենի հետ կապված միգրենն անվանել է ծանր. դրա նոպաները կարող են ինտենսիվ լինել, տևել մի քանի օր։
