Իսրայելը չեղարկել է պատվիրակության այցը Վաշինգտոն՝ ՄԱԿ-ի ԱԽ-ում բանաձևի ընդունման պատճառով
ՄԱԿ-ի Անվտանգության խորհրդում Գազայի հատվածում անհապաղ հրադադար պահանջող բանաձևի ընդունումից հետո Իսրայելը չեղարկել է բարձրաստիճան պատվիրակության այցը ԱՄՆ։ Այս մասին հաղորդում է CNN-ը։
Քվեարկության ժամանակ ԱՄՆ-ն ձեռնպահ է մնացել՝ ի տարբերություն նախորդ քվեարկությունների, երբ Վաշինգտոնը վետո էր դրել Գազայում հրադադար պահանջող բանաձևերի վրա։ Մարտի 25-ին Վաշինգտոնի ձեռնպահ մնալու պատճառով բանաձևն ընդունվել է․ ՄԱԿ-ի ԱԽ 15 անդամներից մնացած 14-ը կողմ են քվեարկել դրան։
Բանաձևը ներկայացրել էին Անվտանգության խորհրդի 10 ոչ մշտական անդամները։ Այն պահանջում է մուսուլմանների սուրբ Ռամադան ամսվա ընթացքում հրադադար հաստատել, անմիջապես ազատ արձակել պաղեստինյան ՀԱՄԱՍ արմատական շարժման մոտ պահվող պատանդներին և հումանիտար օգնություն մատակարարել Գազայի հատված։
ՀԱՄԱՍ-ը և Պաղեստինյան ազգային վարչակազմը ողջունել են բանաձևը, իսկ ՄԱԿ-ում Իսրայելի դեսպանը քննադատել է ՄԱԿ-ի ԱԽ-ին այնպիսի բանաձև ընդունելու համար, որը կոչ է անում հրադադարի՝ «առանց այն պայմանավորելու պատանդների ազատ արձակման հետ»։
Իսրայելի արտգործնախարար Իսրայել Կացը X սոցիալական հարթակում գրել է, որ իր երկիրը չի կատարի բանաձևի պահանջները և «կոչնչացնի ՀԱՄԱՍ-ը և շարունակի կռվել, մինչև վերջին պատանդը վերադառնա տուն»։
Իսրայելն ավելի վաղ հայտարարել էր, որ նախատեսում է ռազմական գործողություններ սկսել Գազայի հարավում գտնվող Ռաֆահ քաղաքում, որտեղ ապաստանել է 1,4 միլիոն պաղեստինցի։ ԱՄՆ-ն դեմ է արտահայտվել այս ծրագրին՝ պահանջելով ապահովել քաղաքացիական բնակչության անվտանգությունը։
Իսրայելի ազգային անվտանգության հարցերով խորհրդականի և վարչապետ Բենիամին Նեթանյահուի խորհրդականի այցի հետաձգումը ԱՄՆ-ում հիասթափությամբ են ընդունել։ ԱՄՆ ազգային անվտանգության խորհրդի խոսնակ Ջոն Քիրբին հայտարարել է, որ այդ այցի ընթացքում պետք է քննարկվեին Ռաֆահում ցամաքային գործողության այլընտրանքային տարբերակները։
Միևնույն ժամանակ Իսրայելն օրերս համաձայնել է 700 պաղեստինցի բանտարկյալների իսրայելցի 40 պատանդների հետ փոխանակելու գործարքին։
