Լեհաստանի վարչապետը Օրբանին անվանել է ԵՄ միակ հակաուկրաինական քաղաքական գործիչ
Լեհաստանի վարչապետ Դոնալդ Տուսկն իր հունգարացի գործընկեր Վիկտոր Օրբանին անվանել է Եվրամիության միակ հակաուկրաինական քաղաքական գործիչ։ Այդ մասին տեղեկացնում է «ՌԻԱ Նովոստի»-ն։
«Եվրոպայում պատերազմի սկսվելուց հետո շատ բան է փոխվել։ Հունգարիան մնաց, ավելի ճիշտ՝ ոչ Հունգարիան, ես չէի ցանկանա օգտագործել մեզ այդքան բարեկամ երկրի անունը, այլ Հունգարիայի վարչապետ Վիկտոր Օրբանը մենակ մնաց մարտի դաշտում։ Նա միակ ակնհայտ հակաուկրաինական քաղաքական գործիչն է»,- ասել է Տուսկը։
Հունգարիան ներկայումս արգելափակում է Ուկրաինայի վերաբերյալ ԵՄ որոշումների մեծ մասը, այդ թվում՝ 500 միլիոն եվրոյի ռազմական օգնության ութերորդ մասնաբաժինը, 2024 թվականին Խաղաղության եվրոպական հիմնադրամի կողմից ռազմական աջակցության համար տրամադրվող հերթական մասնաբաժինը, չորս տարվա ընթացքում 20 միլիարդ եվրոյի ռազմական օգնության ավելի լայն փաթեթը և 2024-2027 թվականների համար նախատեսված 50 միլիարդ եվրոյի մակրոֆինանսական օգնությունը։
