Հայաստանի ու Ադրբեջանի միջև սահմանազատումը պետք է հստակ լինի, որպեսզի հետագա վայրագություններ չդրսևորվեն․ Հունաստանի ԱԳ նախարար
«Խաղաղության խաչմերուկն արդարացի լուծում է խնդրին»,- այս մասին այսօր Երևանում ասաց նախօրեին պաշտոնական այցով ՀՀ ժամանած Հունաստանի արտաքին գործերի նախարար Յորղոս Գերապետրիտիսը՝ խոսելով Երևան-Բաքու խաղաղության հնարավորության մասին։
Հունաստանի ԱԳ նախարարն ասաց, որ Հունաստանն հավատում է երկխոսությանը։ «Հունաստանում մենք շարունակաբար երեք բառ ենք ասում, որոնք ցանկացած վեճի ու ագրեսիայի լուծում կարող են հանդիսանալ՝ ժողովրդավարություն, դիվանագիտություն և երկխոսություն։ Մենք գտնում ենք, որ ներգրավված կողմերը պետք է շարունակաբար երկխոսության մեջ լինեն։
Ես գտնում եմ, որ ՀՀ կառավարության ներկայացրած Խաղաղության խաչմերուկ նախագիծը շատ իրատեսական, արդարացի ու կայուն լուծում է խնդրին»,- ասաց Գերապետրիտիսը։ Նա նաև ասաց, որ Հունաստանը կարծում է, որ խաղաղության գործընթացը պետք է հստակ ներառի կոնկրետ խնդիրներ։
«Սահմանազատումը պետք է հստակ լինի, որ հետագա վայրագություններ չդրսևորվեն։ Երկու կողմերը պետք է ներգրավված լինեն այս գործընթացում, կա իրատեսական հնարավորություն, կարող ենք ապագայում լուծումների հասնել»,- ասաց պաշտոնական այցով Երևանում գտնվող Հունաստանի գլխավոր դիվանագետը։
