«Սեպտեմբերի 25-ից մինչև նոյեմբերի 26-ն ընկած ժամանակահատվածում ԼՂ-ի հաշվառում ունեցող 10.929 անձ է մեկնել ՀՀ-ից, որոնցից 4303-ը վերադարձել է». ԱԱԾ
Հոկտեմբերի կեսերին Նիկոլ Փաշինյանը կառավարության նիստում հայտարարեց, որ սեպտեմբերի 19-ից հետո Արցախի Հանրապետությունից բռնի տեղահանված և Հայաստանում հաստատված արցախահայերից մոտ 3000 հոգի դուրս է եկել Հայաստանից։
«Ես չեմ ուզում այդ մասին այժմ հետևություններ անել, գուցե նրանցից շատերը գնում են իրենց ազգականներին տեսնելու, մի քիչ ժամանակ անցկացնելու, և ես հույս ունեմ, որ հստակ ուղերձ ենք տալիս՝ որպես առաջնային պլան՝ ՀՀ-ում մնալը։ Կոչ եմ անում ՀՀ-ից արտագաղթը չդիտարկել՝ որպես գործողությունների առաջնային պլան»,- ասել էր Նիկոլ Փաշինյանը։
168.am–ը ՀՀ միգրացիոն ծառայության հանրային կապերի պատասխանատու Նելլի Դավթյանից հետաքրքրվեց, թե սեպտեմբերից 25-ից մինչև օրս, Արցախից բռնի տեղահանված և Հայաստանում հաստատված քանի արցախահայ է լքել Հայաստանը։
«Նման տվյալներ չունենք, եռամսյակային տվյալներով ենք սահմանահատումներն ամփոփում, կոնկրետ արցախահայերի վերաբերյալ առանձին տվյալներ չունենք։ Այս պահին նման հանձնարարություն ու խնդիր մեր առջև չունենք»,- հակիրճ մեկնաբանեց Նելլի Դավթյանը։
168.am-ը նույն հարցն ուղղեղ նաև Ազգային անվտանգության ծառայությանը, հարցի վերաբերյալ ծառայության լրատվական բաժնից, մասնավորապես, փոխանցեցին հետևյալ պատասխանը.
«2023 թվականի սեպտեմբերի 25-ից մինչև նոյեմբերի 26-ն ընկած ժամանակահատվածում Լեռնային Ղարաբաղի հաշվառում ունեցող 10.929 անձ է մեկնել Հայաստանից, որոնցից 4303-ը վերադարձել է»։
Հաջորդ հարցին՝ թե որ երկիր են կոնկրետ գնացել արցախահայերը, ԱԱԾ լրատվական բաժնից ասացին, որ դիմենք գրավոր։
