«Այս պահի դրությամբ բուժում է ստանում 210 պացիենտ՝ 56-ի վիճակը ծանր է, 10-ինը՝ ծայրահեղ ծանր». Մարիամ Ծատրյան
Այս տարվա սեպտեմբերի 25-ին Ստեփանակերտ-Ասկերան ավտոճանապարհի հարակից տարածքի բենզինի պահեստում տեղի ունեցավ հզոր պայթյուն: Կային զոհեր և այրվածքներ ստացած բազաթիվ վիրավորներ, որոնց մի մասը հետագայում տեղափոխվեց Հայաստան:
«Արցախի Հանրապետությունից ռազմական գործողությունների և պայթյունի հետևանքով Հայաստան տեղափոխված և մայրաքաղաքի տարբեր բժշկական կենտրոններում բուժում ստացող անձանց թիվն այսօր ժամը 11։00-ի դրությամբ 210 է»,- 168.am-ի հետ զրույցում ասաց ՀՀ առողջապահության նախարարի մամուլի քարտուղար Մարիամ Ծատրյանը։
«56 պացիենտի վիճակը ծանր է, 10-ինը՝ ծայրահեղ ծանր։
20 պացիենտ իրենց բուժումը ստանում են արտասահմանյան նեղ մասնագիտական կլինիկաներում»,- նշեց Մ. Ծատրյանը։
Երեկվա դրությամբ գրանցվել է 37 անձի մահ՝ Հայաստան օդային ու ցամաքային ճանապարհով տեղափոխվելուց ի վեր։
Հիշեցնենք, որ սեպտեմբերի 19-ին, 9 ամիս Արցախը տոտալ շրջափակման մեջ պահելուց հետո, Ադրբեջանը լայնածավալ ռազմական գործողություններ սկսեց, սպանվեցին, խոշտանգվեցին և գերեվարվեցին խաղաղ բնակիչներ։ Էթնիկ զտման ու ցեղասպանության վտանգի տակ արցախահայությունը պարտադրված էր լքել իր հայրենիքը՝ Արցախը։
Սեպտեմբերի 25-ին Ասկերանում տեղի ունեցավ պայթյուն, որի հետևանքով հարյուրավոր քաղաքացիներ ստացան տարբեր աստիճանի այրվածքներ, այդ տարածքում գտնվող բազմաթիվ մարդկանց ճակատագիրը մինչև այս պահն անհայտ է, եղան նաև բազմաթիվ մահվան դեպքեր։
