Ծանրամարտի Ավստրիայի հավաքականի մարզչական շտաբի ներկայացուցիչը տպավորված է Եվրոպայի երևանյան առաջնության մակարդակով
Ծանրամարտի Ավստրիայի հավաքականի մարզչական շտաբի անդամ Վիկտորիա Հանը տպավորված է Երևանում ընթացող Եվրոպայի առաջնության կազմակերպվածությամբ:
«Սա իմ առաջին այցելությունը չէ Հայաստան: 7-րդ անգամն է, որ գալիս եմ այս երկիր: Իսկապես սիրել եմ Հայաստանը, այն շատ գեղեցիկ երկիր է: Իսկ Երևանը պարզապես հրաշալի է: Արդեն հասցրել եմ մի շարք վայրերում լինել»,- «Արմենպրես»-ի հետ զրույցում ասաց Հանը:
Վերջինս առանձնացրեց երևանյան առաջնության կազմակերպվածության բարձր մակարդակը:
Նա հավելեց, որ առաջնությունը հրաշալի է կազմակերպված։ Ավստրիայի պատվիրակության ներկայացուցիչը գոհ է կամավորների աշխատանքից, որոնք օգնում են ցանկացած հարցում։ Նրան տպավորել են նաև արենան ու մարզումային դահլիճը։ Հանն ընդգծում է, որ այս օրերին վայելում են ստեղծված պայմանները։
Հանը, ով երկար տարիներ աշխատում է Ավստրիան ներկայացնող մի խումբ հայ ծանրորդների հետ, սկսել է հայերեն սովորել:
Ծանրամարտի Եվրոպայի առաջնությունը ընթանում է Երևանի Կարեն Դեմիրճյանի անվան մարզահամերգային համալիրում ապրիլի 15-23-ը: Անկախ Հայաստանի պատմության մեջ առաջին անգամն է, որ Երևանն ընդունում է նման խոշորամասշտաբ մրցաշար: Ծանրամարտի Եվրոպայի առաջնությունը վարկանիշային է Փարիզի 33-րդ ամառային Օլիմպիական խաղերի համար: Առաջնությանը մասնակցում են մոտ 40 երկրի 500-ից ավել մարզիկներ: Ընդհանուր պատվիրակությունների թիվը գերազանցում է 1000-ը:
