Կանանց համար՝ թարմ ենթակառուցվածքներ, տղաներին՝ տուն-կացարաններ. կանանց պարտադիր ժամկետային ծառայության վայրն ընտրված է

168.am-ը գրել էր, որ Պաշտպանության նախարարությունը շրջանառության մեջ է դրել «Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին» և «Պաշտպանության մասին» օրենքում լրացումներ կատարելու մասին» օրենսդրական փաթեթի նախագիծ: Ավելի վաղ հայտնել էինք, որ ՀՀ ՊՆ-ում քննարկում են կանանց կամավոր ժամկետային զինվորական ծառայության անցնելու մասին հարցը:

Կառավարությունը՝ ի դեմս ՀՀ պաշտպանության նախարարության, նպատակահարմար է գտել կանանց պարտադիր զինվորական ծառայության ժամկետը սահմանել 6 ամիս և ծառայությունն անցնողների համար նախատեսել 1,5 մլն դրամ պատվովճար:

Փետրվարի 9-ի կառավարության նիստի ժամանակ Նիկոլ Փաշինյանը սա համարել է կարևոր բարեփոխում:

«Մենք հնարավորություն ենք տալու, որպեսզի կանայք կամավորության հիմունքներով 6-ամսյա ժամկետային զինծառայություն անցնեն, որից հետո կարող են «Պաշտպան հայրենյաց» ծրագրի տրամաբանությամբ անցնել ավելի երկարաժամկետ զինվորական ծառայության»,- շեշտել է նա:

Այսինքն, իշխանությունները փորձում են նաև այս տարբերակով «Ես եմ» ծրագրի պատճենված տարբերակի՝ «Պաշտպան հայրենյացի» համար շահառուներ գտնել: Չենք բացառում, որ կանանցից պարտադիր զինվորական ծառայություն անցնել ցանկացողները շատ կլինեն, այստեղ հարցը՝ շարժառիթն է, և թե քանիսը այդ դիմողներից կցանկանան դառնալ պայմանագրային զինծառայող, և բանակը որքանով կշահի սրանից: Այսինքն, ցանկացած նման լուրջ քայլից առաջ անհրաժեշտ է կատարել ուսումնասիրություն և հստակ հաշվարկ: Եվ եթե, օրինակ, ընդօրինակում ենք որևէ երկրի փորձ, ապա որքանո՞վ է այն համադրելի հայաստանյան իրողությունների և առկա մարտահրավերների հետ:

Ի դեպ, 2022 թվականի նոյեմբերին ՀՀ ՊՆ պատվիրակությունը ճանաչողական այցով եղել էր Շվեդիայում:

Այցի ընթացքում պատվիրակությունն այցելել էր Շվեդիայի զինված ուժերի հեծելազորային զորամասեր, Պահակային գունդ և ռազմական գործողություններում գենդերային հարցերի սկանդինավյան կենտրոն և ծանոթացել Շվեդիայի զինվորական կարգապահական համակարգին, ազգային պաշտպանության ինստիտուտի և ռազմական ոստիկանության գործունեությանը, Շվեդիայի զինված ուժերում կանանց ներգրավվածության խթանման ուղղությամբ իրականացվող աշխատանքներին: Գուցե սկանդինավյան փորձն ենք հիմք ընդունել:

Ինչ վերաբերում է կանանց պարտադիր ժամկետային զինվորական ծառայության համար անհրաժեշտ պայմաններին, կառավարության վերջին նիստի ժամանակ Նիկոլ Փաշինյանը հայտարարել է՝ խնդիր են դրել, որ կանանց համար հնարավորինս նոր կամ շատ թարմ ենթակառուցվածքներ լինեն:

«Նոր էջ է, և մենք պետք է նոր բովանդակությամբ և թարմությամբ այդ պրոցեսը սկսենք»,- ընդգծել է նա:

ՀՀ պաշտպանության նախարար Սուրեն Պապիկյանն էլ հավելել է. «Ամեն ինչ կանենք, որ ձմեռային զորակոչին հասցնենք, որովհետև դժվարանում եմ ասել՝ կկարողանա՞նք ամառային զորակոչից առաջ հասցնել ենթակառուցվածքների առումով: Ամեն ինչ կախված է մեր արագությունից»:

168.am-ի տեղեկություններով, կանանց պարտադիր ժամկետային զինվորական ծառայության համար նախատեսված զորամասի կամ դրա տեղակայման վայրի տարածքն արդեն ընտրված է, պարզապես գաղտնիության սկզբունքից և անվտանգությունից ելնելով՝ չենք հրապարակի այն: Կախված դիմորդների քանակից, հնարավոր է՝ լինի ոչ թե մեկ վայր, այլ վայրեր՝ կառուցման կամ վերանորոգման աշխատանքներից հետո:

Թե որքանով է այս գաղափարի իրականացումն անհրաժեշտ, երբ արական սեռի զինվորների ծառայության վայրերը տուն-զորանոցներն են, ՊՆ-ից մեզ հերթական անգամ հիշեցրեցին իտալական մոդուլային կացարանների մասին, և, որ դրանց մշտական տեղակայման վայրը պատրաստ է լինելու 2023-ի վերջին: Այսինքն, առնվազն մեկ տարի զինվորները զինվորական ծառայություն են իրականացնելու ոչ դասական զորանոցային պայմաններում:

Ըստ այդմ՝ խնդիրը բնավ կանանց պարտադիր զինվորական ծառայության ներդրմանը դեմ կամ կողմ լինելը չէ, այլ, թե որքանով են երկրորդային խնդիրներին զուգահեռ՝ լուծվում առաջնային խնդիրները:

Ի դեպ, հետաքրքիր է՝ կանանց պարտադիր զինվորական ծառայության մասին ոգևորված խոսող և դուստր կամ դուստրեր ունեցող պաշտոնյաները, որոնք, թերևս, իրենք էլ չեն ծառայել կամ իրենց տղաներին ազատել են բանակից, կո՞ղմ կլինեն իրենց աղջիկների կամավոր զինծառայությանը, թե՞…