Մակրոնը լքեց հայերին, Հայաստանը դարձել է ցինիկ աշխարհաքաղաքական պատերազմի պատանդ. Տիգրան Եգավյան
Ներկայացնում ենք ԱՄՆ Սթենֆորդի համալսարանի քաղաքագիտության դոկտոր Արթուր Խաչիկյանի զրույցը արևելագետ, Արևելքի քրիստոնեության ֆրանսիական ինստիտուտի աշխատակից, Ֆրանսիայի՝ Քաղաքական գիտությունների ինստիտուտի ասպիրանտ Տիգրան Եգավյանի հետ: Հարցազրույցը ներկայացնում ենք ֆրանսերենով: Առաջիկայում կներկայացնենք նաև հայերենով նրանց զրույցը:
Տիգրան Եգավյանի կարծիքով՝ հայ-ֆրանսիական հարաբերությունները գնահատելիս պետք չէ պատրանքներ ունենալ:
Հարցազրույցն ամբողջությամբ դիտեք 168.am-ում՝ իր բնօրինակ տարբերակով։
Զրույցից մի հատված ներկայացնենք.
Արթուր Խաչիկյան.- Ի՞նչ եք կարծում, ինչո՞ւ էր Մակրոնը նստած այդ մարդու (Նիկոլ Փաշինյանի) կողքը, երբ նա Պրահայում հանձնում էր Ղարաբաղը՝ 120.000 մարդկանց հետ միասին, ովքեր հետո դարձան փախստականներ:
Տիգրան Եգավյան.- Դուք պետք է հասկանաք, որ Ֆրանսիան հիբրիդային պատերազմ է մղում Ռուսաստանի դեմ: Ֆրանսիայի աքիլեսյան գարշապարը ֆրանկոֆոն Աֆրիկան է: Ռուսաստանն ապակայունացնում է Ֆրանսիան Աֆրիկայում: Սա պատերազմ է, որտեղ ամեն ինչ կարելի է: Տեղի ունեցավ սրացում։ Հայաստանը Ֆրանսիայի համար հնարավորություն ստեղծեց հակահարված տալու Ռուսաստանին։ Ֆրանսիան շատ նյարդայնացած էր Մինսկի խմբում իր դիվանագիտական ազդեցությունը կորցնելուց։ Մակրոնը ցանկանում էր Ռուսաստանին պատասխան հարված հասցնել հետխորհրդային տարածքում, իսկ Հայաստանը՝ Կովկասի ամենափխրուն պետությունը, ամենահեշտ թիրախն էր։ Հայերն «օգտակար հիմարներ» էին այս պատերազմում։ Նրանց օգտագործեցին՝ որպես գործիք, որպես օբյեկտ։ Հենց սա է պատճառը, որ Մակրոնը հետաքրքրված է Հայաստանով։
Արթուր Խաչիկյան.- Այսինքն՝ կարելի է ասել, որ Մակրոնը զոհաբերեց հայերին՝ Պուտինից վրեժ լուծելու համա՞ր։
Տիգրան Եգավյան.- Ես այլ կերպ կասեի. նա լքեց հայերին։ Բայց, ցավոք, սա նորություն չէ։ Հայերը զգացմունքային ժողովուրդ են, իսկ միջազգային հարաբերությունները չեն աշխատում զգացմունքների վրա։
Անցյալում Ֆրանսիան հայերին լքեց Կիլիկիայում 1921 թվականին և Ալեքսանդրիայի սանջակում 1939 թվականին։ Մուսա լեռան հերոսները ֆրանսիական նավերով փրկվեցին՝ ֆրանսիական ստորին մակարդակի ռազմական հրամանատարության որոշմամբ, առանց նախարարության հետ խորհրդակցելու։ Հետագայում պատմությունը վերաշարադրվեց։
