Հայկական ֆուտբոլի չխամրող աստղը՝ Հենրիխ Մխիթարյանը, փայլում է իտալական ակումբում

Հայկական ֆուտբոլի բոլոր ժամանակների չմարող աստղը՝ Հենրիխ Մխիթարյանը, փայլում է իտալական «Ինտերի» կազմում: Հայկական «Փյունիկից» իր ֆուտբոլային կարիերան սկսած Հենրիխ Մխիթարյանը, ով հետո խաղաց դոնեցկյան երկու ակումբների՝ «Մետալուրգի» և «Շախտյորի» կազմում, ապա տեղափոխվեց գերմանական Բունդեսլիգա՝ փայլուն մրցելույթներ ունենալով Դորտմունդի «Բորուսիայում», հետագայում՝ անգլիական «Մանչեսթեր Յունայթեդում» և «Արսենալում», ապա՝ Հռոմի «Ռոմայում», այժմ փայլուն է խաղում իտալական «Ինտերում», և դա այն տարիքում, երբ շատերն արդեն մեխից են կախում խաղակոշիկները:

Նախորդ շաբաթ Հայաստանի ազգային հավաքականի նախկին ավագը Միլանի «Ինտերի» կազմում գոլի հեղինակ դարձավ «Ֆիորենտինայի» դեմ խաղում՝ հաղթանակ պարգևելով իր թիմին: Անմիջապես այդ խաղից հետո արդեն Չեմպիոնների լիգայում՝ եվրոպական գլխավոր ֆուտբոլային մրցաշարում, «Ինտերը» վստահ հաղթանակ տոնեց Պլզենի «Վիկտորյայի» նկատմամբ՝ դուրս գալով 1/8 եզրափակիչ և «Բարսելոնային» զրկելով իր ելույթները շարունակելու հնարավորությունից: Հենրիխ Մխիթարյանը ֆանտաստիկ հանդես եկավ նաև այդ խաղում՝ կրկին դառնալով գոլի հեղինակ:

Հենրիխ Մխիթարյանն արդեն իր հաստատուն տեղն ունի միլանյան ակումբի մեկնարկային կազմում:

Պլզենի «Վիկտորյայի» հետ հաղթական խաղից հետո Հենրիխ Մխիթարյանն, անդրադառնալով «Ինտերի» կազմում արդեն երկու գոլ խփելու փաստին, ասել է՝ դա կախված է նաև թիմի խաղից, և ինչքան թիմը լավ է խաղում, այնքան լավ է ստացվում նաև իր խաղը:

«Ավելի վստահ եմ զգում, փորձում եմ նաև օգտակար լինել առջևի գծում: Գոլի հեղինակ դարձա, բայց ամենակարևորը թիմի հաղթանակն է»,- ասել է նա:

Այդ խաղից հետո Հենրիխ Մխիթարյանը դարձավ աշխարհի այն 4 ֆուտբոլիստներից մեկը, ով 7 թիմի կազմում եվրագավաթների խաղերում դարձել է գոլի հեղինակ:

Հիշեցնենք, որ այս տարվա մարտի 3-ին Հենրիխ Մխիթարյանը որոշեց դադարեցնել իր մրցելույթները Հայաստանի ֆուտբոլի ազգային հավաքականի կազմում:

«Վերջին 15 տարիների ընթացքում մեծագույն պատվով եմ խաղացել իմ ազգային հավաքականում, իսկ վերջին 6 տարիների ընթացքում՝ առավել պատվով կրել նրա ավագի թևկապը:
95 միջազգային խաղերից, քրտնաջան աշխատանքից, նվիրումից և իմ երկիրը խաղադաշտում ներկայացնելու ընթացքում աննախադեպ վերելքներից և վայրէջքներից հետո որոշում եմ կայացրել
ավարտել Հայաստանի ազգային հավաքականի կազմում մրցելույթներս:

Այս եզրահանգմանն եմ եկել նոյեմբերին Գերմանիայի դեմ կայացած իմ վերջին խաղից հետո։ Կարծում եմ, որ ճիշտ ժամանակն է և, որ տվել եմ իմ հավաքականին ​​ամենը՝ ինչ կարող էի:
Հետևաբար առաջիկա տարիներին ամբողջությամբ կենտրոնացած կլինեմ ակումբային մրցելույթներիս վրա:

Իմ ֆուտբոլային սկիզբը կերտվել է Հայաստանում՝ իմ հայրենիքում, և ես հավերժ երախտապարտ կլինեմ բոլոր նրանց, ովքեր աջակցել են ինձ, ովքեր մարզել ու կրթել են ինձ, ում հետ ես խաղացել եմ,
և վերջապես յուրաքանչյուրին, ով նպաստել է իմ՝ որպես ֆուտբոլիստ և որպես մարդ, կայացմանը»,- գրել էր Հենրիխ Մխիթարյանը սոցցանցի իր էջում:

Հենրիխի որոշումն անակնկալ էր շատերի համար, բայց ամեն ինչ գնում էր դրան։ Վերջին տարիներին Հայաստանի ֆուտբոլի ֆեդերացիայի և Հենրիխի հարաբերություններն ակնհայտորեն վատթարացել էին։

Ինքը՝ Հենրիխը, չի խոսում այս մասին՝ հեռու մնալով սկանդալներից և ուշադրություն չհրավիրելով իր անձի վրա։ Ամեն դեպքում, չի կարելի չհիշել, որ Արմեն Մելիքբեկյանի գալով՝ Մխիթարյանի մայրը՝ Մարինա Թաշյանը, երկար տարիներ ֆեդերացիայում աշխատելուց հետո չընտրվեց ՀՖՖ գործկոմի անդամ։