Արցախի համար ընդունելի է ոչ թե «ԼՂ հայեր», այլ «Արցախի Հանրապետության քաղաքացիներ» եզրույթը. Արցախի նախագահի մամուլի խոսնակ. «Փաստինֆո»
ՀՀ ԱԳՆ հաղորդագրության համաձայն՝ Միրզոյանի ու Բայրամովի՝ հոկտեմբերի 2-ին Ժնևում ունեցած հանդիպմանը մտքեր են փոխանակվել «Լեռնային Ղարաբաղի հայության իրավունքների և անվտանգության երաշխիքների ապահովման վերաբերյալ, այդ թվում` Ստեփանակերտի և Բաքվի միջև քննարկումների մեխանիզմի ստեղծման միջոցով»։ Հանդիպման արդյունքների վերաբերյալ «Փաստինֆո»-ի խնդրանքով պաշտոնական Ստեփանակերտի դիրքորոշումը ներկայացրել է Արցախի Հանրապետության նախագահի մամուլի խոսնակ Լուսինե Ավանեսյանը։
-«ԼՂ հայեր» եզրույթի կիրառումն ընդունելի՞ է արդյոք նման մակարդակի բանակցությունների ժամանակ։ Միջազգային հանրության մոտ այն թյուրըմբռնում կարո՞ղ է առաջացնել։
– Արցախի Հանրապետության իշխանությունների համար ընդունելի է ԼՂՀ կամ Արցախի Հանրապետության քաղաքացիներ եզրույթը։
– Ստեփանակերտի և Բաքվի միջև քննարկումների մեխանիզմ ստեղծելու հարցը նախքան Ժնևյան հանդիպումն Արցախի իշխանությունների հետ համաձայնեցվե՞լ է արդյոք։ Արցախ –Ադրբեջան ուղիղ կապը հնարավոր համարո՞ւմ եք։ Ինչպե՞ս եք այն պատկերացնում ներկա վիճակում։
– Բաքվի և Ստեփանակերտի միջև առկա հարաբերություններին ԱՀ նախագահը անդրադարձել է 2022թ. սեպտեմբերի 19- ի ուղերձում՝ նշելով, ԱՀ-ն բաց է ադրբեջանական կողմի հետ բանակցություններով կարգավորել բոլոր հիմնախնդիրները, այդ թվում՝ անվտանգային, հումանիտար ու ենթակառուցվածքային բնույթի, առանց Արցախի կարգավիճակի հարցի շոշափման: Ինչ վերաբերում է Ադրբեջանի հետ հակամարտության կարգավորմանը, ապա 2022թ. հոկտեմբերի 3-ի ԱՀ ԱԽ հայտարարության մեջ հստակեցվել է, որ Արցախի իշխանությունները պատրաստ են Ադրբեջանի հետ բանակցություններ վարել հակամարտության կարգավորման շուրջ՝ բանակցային լիարժեք ձևաչափի վերականգնման դեպքում, որտեղ Արցախի Հանրապետությունը ճանաչված է որպես լիիրավ կողմ:
– Հանրային հեռուստաընկերության եթերում սեպտեմբերի 30-ին Նիկոլ Փաշինյանը հայտարարել է՝ «ո՛չ Մոսկվան, ո՛չ Բրյուսելը, ո՛չ Վաշինգտոնը պատրաստ չեն ճանաչել Ղարաբաղի անկախությունը և պատրաստ չեն Ղարաբաղը ճանաչել որպես Հայաստանի մաս»: Պաշտոնական Ստեփանակերտն ի՞նչ հետևություն է արել այս հայտարարությունից, և արցախահայության ինքնորոշման համար պայքարում մարտավարական փոփոխություններ նախատեսվո՞ւմ են արդյոք։
– Արցախի իշխանությունները գիտակցում են, որ Արցախի ժողովրդի ինքնորոշման իրավունքի իրացման համար դեռևս երկար ու դժվար ճանապարհ կա անցնելու և հայտարարել են կարմիր գծերի գոյության մասին՝ անընդունելի համարելով ցանկացած փաստաթուղթ, որը կարող է անտեսել ղարաբաղյան հակամարտության գոյությունը, հարվածի տակ դնել դրա արդարացի կարգավորման հեռանկարը և սահմանափակել Արցախի ժողովրդի ինքնորոշման իրավունքի և դրա իրացման արդյունքների միջազգային ճանաչման հնարավորությունները, այդ թվում՝ տարածքային ամբողջականության սկզբունքի հանդեպ դրա ստորադասման կեղծ օրակարգով:
