«Մեկ տարի անց արթնանում են և փորձում իմ՝ Հայաստան մուտքի  արգելքն արդարացնել միջադեպով, որի հետ կապ չունեմ». Մուրադ Փափազյան

168 TV-ի եթերում զրուցել ենք Ֆրանսիայի հայկական կազմակերպությունների համակարգող խորհրդի (CCAF) նախագահ, ՀՅԴ Բյուրոյի անդամ Մուրադ Փափազյանի հետ:

Հիշեցնենք՝ Մուրադ Փափազյանը հուլիսի 13-ի երեկոյան ժամանել էր Երևան, սակայն «Զվարթնոց» օդանավակայանում ՀՀ նրա մուտքն արգելել էին: Ցայսօր ՀՀ ԱԱԾ-ն ու ԱԳՆ-ն հրաժարվում էին մեկնաբանություններ տալ այս աղմկահարույց որոշման վերաբերյալ, և միայն այսօր եղավ պաշտոնական պարզաբանում վարչապետի աշխատակազմի կողմից:

«Տվյալ անձը հանդիսանում է նախորդ տարվա հունիսի 1-ին Ֆրանսիայում ՀՀ դեսպանության մոտ վարչապետի գլխավորած կառավարական պատվիրակության՝ ՀՀ պետական դրոշակիր ավտոշարասյան դեմ հարձակում կազմակերպած անձանցից մեկը: Ավտոշարասյան ուղղությամբ նետվել են տարբեր իրեր, առարկաներ: Փաշինյանի ՀՀ պետական դրոշակիր ավտոմեքենան ենթարկվել է հարձակման և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի ջանքերի արդյունքում»,- նշված է կառավարության պարզաբանման մեջ:

Ի դեպ, այս պարզաբանման առնչությամբ 168.am-ը մի քանի հարցադրումներ է հղել Ազգային անվտանգության ծառայությանը, այդ թվում՝ խնդրելով տեղեկացնել, թե ինչու է պաշտոնապես հիշատակվող միջադեպից միայն մեկ տարի անց կայացվել Մուրադ Փափազյանի՝ Հայաստան մուտքն արգելող որոշում, եթե նա մինչ այդ այցերով եղել է Հայաստանում:

«Մի քանի օր առաջ ԱԱԾ-ն հայտարարում էր, թե չի կարող փոխանցել պատճառը, որովհետև այն վերաբերում է իմ անձնական կյանքին, իսկ այսօր վարչապետի աշխատակազմը ներկայացնում է տեղեկություններ, որ ես իբրև թե կազմակերպել և ներկա եմ եղել վարչապետի դեմ 2021 թ. հունիսի 1-ին Փարիզում կազմակերպված ցույցին, ինչը բոլորովին սուտ է»,- իր՝ Հայաստան մուտքի արգելքի առնչությամբ տարածված պաշտոնական պարզաբանման վերաբերյալ մեզ հետ զրույցում ասաց Մուրադ Փափազյանը:

Ֆրանսիայի հայկական կազմակերպությունների համակարգող խորհրդի նախագահը շեշտեց՝ ներկա չի եղել և չի կազմակերպել այդ միջոցառումը, իսկ նման պարզաբանումները համարեց ընդամենը պատրվակ:

Ի դեպ, նա հավելեց, որ հիշատակվող՝ 2021 թ. հունիսի 1-ից հետո 4 անգամ եղել է Հայաստանում:

«Ես շատ մտահոգ եմ Հայաստանի ժողովրդի համար, որ ունի այսպիսի մակարդակի կառավարություն. եթե այսպիսի հարցի են նման կերպ վերաբերվում, չեմ պատկերացնում, թե ինչպես են նրանք գնում բանակցությունների Ադրբեջանի, Թուրքիայի, Ռուսաստանի հետ»,- ասաց նա:

Ի պատասխան հարցին, թե՝ նախորդ 4 այցերի ժամանակ արդյո՞ք այս իշխանությունները Ձեզ ակնարկել են այս խնդիրների մասին, Մուրադ Փափազյանը նշեց, որ երբեք չեն խոսել այդ հարցերի առնչությամբ:

Առհասարակ, մեր զրուցակիցը հնարավոր չի համարում, որ դա է իր մուտքի արգելքի պատճառը, քանի որ չկա որևէ փաստ:

Իսկ թե ինչո՞ւ դեպքից միայն մեկ տարի անց հիշեցին այդ մասին՝ ըստ սփյուռքահայ գործչի տպավորության՝ պայմանավորված է Սփյուռքի գործերի գլխավոր հանձնակատար Զարեհ Սինանյանի մասնակցությամբ, ինչպես նաև՝ Թուրքիայի արտգործնախարար Չավուշօղլուի այն հայտարարությամբ, թե Սփյուռքը խանգարում է հայ-թուրքական հարաբերությունների բարելավմանը:

«Այսօր ստիպված են սուտ խոսել՝ ժողովրդին բացատրելու համար, թե ինչու են արգելել հայ անձնավորության մուտքը Հայաստան, բայց ես ամեն օրինավոր միջոցներին դիմելու եմ, որպեսզի վերականգնվի Հայաստան վերադառնալու իմ իրավունքը: Հայաստանը բոլոր հայերի հայրենիքն է. ի՞նչ իրավունքով է պարոն Փաշինյանն արգելում ինձ մտնել Հայաստան, ո՞ւր էր պարոն Փաշինյանը այն տասնյակ տարիների ընթացքում, երբ մենք պաշտպանում էինք Հայաստանը, Արցախը, երբ մենք պայքարում էինք Հայ Դատի համար: Նա չորս տարի է գործում. ինչպե՞ս կարող է արգելել Հայաստանի, Արցախի և Հայ Դատի քաղաքական զինվորի մուտքը»,- արձանագրեց Ֆրանսիայի հայկական կազմակերպությունների համակարգող խորհրդի (CCAF) նախագահը:

ՀՅԴ բյուրոյի անդամը նաև տեղեկացրեց, որ իր իրավունքները վերականգնելու ուղղությամբ քայլեր է ձեռնարկել, որոնց մասին կտեղեկացնի օրերս:

Անդրադառնալով Հատուկ հանձնարարություններով դեսպան Էդմոն Մարուքյանի այն հայտարարությանը, թե՝ «արտերկրում Հայաստանի Հանրապետությունը ներկայացնող ցանկացած անձի դեմ իրականացված հարձակում կամ ոտնձգություն պարտադիր պետք է ունենա իրավական հետևանք, քանի որ արտերկրում ՀՀ դեսպանատների, ՀՀ դրոշակիր մեքենաների վրա հարձակումները, ըստ էության, համարվում են հարձակում Հայաստանի Հանրապետության դեմ», սփյուռքահայ գործիչը նկատեց.

«Այո՛, ես համաձայն եմ՝ թող իրավական անդրադարձ ունենան: Ինչո՞ւ չդիմեցին Ֆրանսիայի արդարադատությանն այդ ժամանակ. չեմ հասկանում՝ մեկ տարուց հետո արթնանում են և փորձում են իմ՝ Հայաստան մուտքի արգելքն այդ միջադեպով արդարացնել, որի հետ ես կապ չունեմ»:

Դիտարկմանը, թե՝ Ձեզ առնչվող այս դրվագը շատերը նմանեցնում են 1992թ․ հունիսի 29-ին ՀՅԴ բյուրոյի ներկայացուցիչ Հրայր Մարուխյանի՝ Հայաստանից արտաքսման հայտնի սկանդալի հետ, Մուրադ Փափազյանն արձագանքեց.

«Ճիշտ է, որ շատ են նման, ճիշտ է, որ այսօրվա Լևոն Տեր-Պետրոսյանը Նիկոլ Փաշինյանն է:

1992 թ. հունիսի 29-ին Լևոն Տեր-Պետրոսյանն արտաքսեց ընկեր Հրայր Մարուխյանին, որ ՀՅԴ բյուրոյի ներկայացուցիչն էր, այսօր Նիկոլ Փաշինյանն է արգելում ՀՅԴ մեկ այլ անդամի մուտքը Հայաստան: Սա նշանակում է, որ թե՛ Լևոն Տեր-Պետրոսյանը, թե՛ Նիկոլ Փաշինյանը մերժում են ժողովրդավարությունը՝ մինչդեռ թե՛ մեկը, թե՛ մյուսն իշխանության են եկել ժողովրդավարության դրոշակով։ Թե՛ մեկը, թե՛ մյուսը խաբել են ժողովրդին, որովհետև Լևոն Տեր-Պետրոսյանը չկարողացավ արդարացնել Հրայր Մարուխյանի արտաքսման պատճառները, այսօր տեսնում ենք, որ Նիկոլ Փաշինյանը չի կարողանում լրջորեն արդարացնել իմ մուտքի արգելքը Հայաստան:

Ուրեմն՝ վիճակները նման են՝ հույսով, որ առաջիկա քայլերը նույն տեղը չեն տանի»:

Մանրամասները՝ տեսանյութում