Ստամբուլում հանդիպել են Ռուսաստանի և Թուրքիայի պաշտպանության նախարարները
Ստամբուլում հուլիսի 22-ին տեղի է ունեցել ՌԴ պաշտպանության նախարար Սերգեյ Շոյգուի և Թուրքիայի ազգային պաշտպանության նախարար Հուլուսի Աքարի հանդիպումը: Այս մասին հայտնում է թուրքական «Անադոլու» լրատվական գործակալությունը:
Պաշտպանության գերատեսչությունների ղեկավարների հանդիպումը կայացել է Քալենդեր նստավայրում։
Աքարն ու Շոյգուն քննարկել են երկկողմ և տարածաշրջանային օրակարգի հարցեր, այդ թվում՝ տարածաշրջանում անվտանգության ապահովման վերաբերյալ։
Թուրք նախարարը վերահաստատել է Ուկրաինայում հրադադարը հնարավորինս արագ ապահովելու անհրաժեշտությունը։
Աքարը շնորհակալություն է հայտնել Շոյգուին՝ Սև ծովով հացահատիկի և սննդամթերքի անվտանգ փոխադրումն ապահովելու ջանքերի համար։
Շոյգուն ժամանել է թուրքական Ստամբուլ՝ մասնակցելու հացահատիկի հարցով համաձայնագրի ստորագրման արարողությանը, որը թույլ կտա կազմակերպել սննդամթերքի և հացահատիկի արտահանում Ուկրաինայի և Ռուսաստանի սևծովյան նավահանգիստներից։
