«Բա ԲԴԽ 9 անդամների մոտ հարց չի՞ առաջացել, թե ինչո՞ւ են Բորիս Բախշիյանին հիշել հենց հիմա». Արամ Վարդևանյան
ԱԺ «Հայաստան» խմբակցության պատգամավոր Արամ Վարդևանյանն այսօր խորհրդարանում լրագրողների հետ զրույցում անդրադառնալով դատավոր Բորիս Բախշիյանի նկատմամբ քրեական հետապնդում սկսելու և կալանավորելու վերաբերյալ Գլխավոր դատախազի միջնորդության բավարարմանը, կարծիք հայտնեց, որ նպատակն այն է եղել, որ անպայման լինի այլ դատավոր, քանի որ ներկայիս իշխանությունը չի կարողանում հանդուրժել իրական անկախ դատավորի։
«Շատ հնարավոր է, որ առաջիկայում մենք տեսնենք, որ, ենթադրենք, միջնորդություն լինի Բարձրագույն դատական խորհրդին, որ ԲԴԽ-ն հենց ինքն իրեն պատժի և ԲԴԽ-ն դա ևս կանի։ Այսինքն՝ նույն ձևով, ինչպես միաձայն որոշել են, որ Բախշիյանի նկատմամբ պետք է քրեական հետապնդում սկսվի, ավելին՝ կալանավորման թույլտվություն էլ են տալիս։
Ուշադրություն դարձրեք նաև նրան, որ վերջին 4 տարվա ընթացքում նման բան չէր եղել։ Նույն ձև կասեն՝ ինքներս մեզ կպատժենք։ ԲԴԽ-ն այդպիսի ինստիտուցիոնալ, ԵԽԽՎ-ի իմաստով՝ շատ «ժողովրդավարական» կառույց է, որը Սահմանադրությամբ ասում է, որ պետք է դատավորներին պաշտպանեն, բայց իրենք երևի դա այլ կերպ են մեկնաբանում։ Ստացվում է շատ «պատահական», այն բանից հետո, որ Աշոտ Երկաթն է ազատ արձակվում։ Բա ԲԴԽ 9 անդամների մոտ հարց չի՞ առաջացել, թե ինչո՞ւ են Բորիս Բախշիյանին հիշել հենց հիմա։
Եթե հիմա են սկսել նման որոշում կայացնել, բացառապես պայմանավորված է նրանով, որ կոնկրետ այս դատավորը ցուցաբերել է իրական անկախություն»,- նշեց Արամ Վարդևանյանը։
Ինչ վերաբերում է ԲԴԽ-ի այդ որոշման դեմ նախատեսված բողոքի ցույցերին, Արամ Վարդևանյանն ասաց, որ պատրաստ է մասնակցել նման ցանկացած միջոցառման, քանի որ սրանով կարծես թե դատական համակարգի վերջին մեխն են խփում։
Նրա բնորոշմամբ, այսօրվա իշխանությունները վերջին տարիների ընթացքում բառացիորեն ստեղծեցին կալանքի դատարաններ և մեկ առ մեկ ընտրեցին, թե ովքեր պետք է լինեն այնտեղի դատավորները։
«Եթե ԵԽԽՎ-ի պատկերացմամբ՝ Գագիկ Ջհանգիրյանը հանդիսանում է այդ ժողովրդավարության բաստիոնը, ապա այդ դեպքում եկեք ես լռեմ, օգտվեմ լռելու իրավունքից։ Օրինակ, ինձ կվստահե՞ք, որպեսզի ես իրականացնեմ ֆինանսաբյուջետային համակարգի ռեֆորմ, չե՞ք ասի, թե ի՞նչ առնչություն ունեմ այդ ոլորտի հետ։ Հիմա ես չեմ պատկերացնում, թե Գագիկ Ջհանգիրյանն ի՞նչ առնչություն ունի բարեփոխումնների հետ»,- ընդգծեց նա։
Միաժամանակ նա ասաց, որ իշխանությունների դեպքում հետապնդումներ սկսելն իրավիճակային է, հետևաբար՝ այս պահին արդեն որոշել են, որ դատավորի նկատմամբ պետք է սկսվի հետապնդում, մինչդեռ խոսում են ժողովրդավարության մասին։ Ուզում եմ ԵԽԽՎ-ին իսկապես հարց տալ՝ կարծում են՝ իսկապես սա՞ է ժողովրդավարությունը։
«Բռնապետության մասին խոսելիս միշտ կարելի է հիշել Սադամ Հուսեյնին, օրինակ, նույն ԱՄՆ և ԵՄ դեսպանը, կարծում եմ՝ լավ կհիշեն։ Նա էլ էր ասում, որ որևէ մեկի նկատմամբ ռեպրեսիա չի իրականացվում, որ Իրաքի դատարաններն աշխարհի ամենաարդար դատարաններն են, իրավապահներն էլ բարեխիղճ, օրենքին ծառայող մարդիկ են։ Բայց մարդկանց տանում էին ու տարիներով կալանավորում էին»,- եզրափակեց նա։
