Մնաց աթոռները բերեն և լույսերը. Ե՞րբ այցելուների համար իր դռները կբացի Երևանի կրկեսի նոր շենքը
«Երևանի կրկեսի նոր շենք հնարավոր կլինի մուտք գործել 2022 թվականի մարտ-ապրիլ ամիսներին»,- վստահեցնում է «Երևանյան կրկես» մշակութային կենտրոնի գեղարվեստական ղեկավար և հիմնադիր տնօրեն Սոս Պետրոսյանը:
«Մնաց աթոռները բերեն և լույսերը»,- մեզ հետ զրույցում ասաց Սոս Պետրոսյանը:
Նրա փոխանցմամբ՝ նախկին 1563 տեղի փոխարեն՝ այսուհետ կլինի մոտ 2500 տեղ:
«Տոմսերը չեն թանկանա: Նախկինում 1000 դրամ էր, բայց երբ 1500 դրամ էր արժենում, ժողովուրդը բողոքում էր, իսկ հիմա Արամ Խաչատրյան համերգասրահում կրկեսային ներկայացում են անում ու տոմսի արժեքը՝ 5000 դրամ»,- նշեց Սոս Պետրոսյանը:
«Երևանյան կրկես» մշակութային կենտրոնի գեղարվեստական ղեկավարը հայտնեց նաև, որ ստեղծագործական կոլեկտիվը՝ բաղկացած մոտ 3000 դերասանից, սփռված է ամբողջ աշխարհում, այս ընթացքում միշտ հյուրախաղերի է մեկնել: Իսկ Երևանի թատրոնի և կինոյի պետական ինստիտուտում «Կրկեսային ռեժիսուրա» բաժինն է բացվել, որտեղ պատրաստում են կրկեսային ռեժիսորներ։
Հիշեցնենք, որ Երևանի կրկեսի նոր շենքի կառուցման ավարտին սպասում են դեռ 2012թ. սեպտեմբերի 8-ից, երբ նորը կառուցելու համար պայթեցվեց կրկեսի հին շենքը:
1930-ական թվականներին Երևանում եղել է փայտաշեն ժամանակավոր կրկես։ Երևանի կրկեսի առաջին շենքը գտնվում էր ներկայիս կրկեսի վայրում և նախատեսված էր 800 հանդիսատեսի համար։ Շենքի հեղինակն էր Նիկողայոս Բունիաթյանը։ 1939 թվականին նույն տեղում կառուցվել է նոր շենք (ճարտարապետներ՝ Ա.Ասատրյան և Ալեքսանդր Սահինյան), որը հիմնովին վերակառուցվել է 1950 թվականին ճարտարապետներ Վաղարշակ Բելուբեկյանի և Կառլեն Վարդանյանի նախագծով, իսկ 1962 թվականին այն կրկին վերակառուցվել է։ 2011 թվականից շենքը վթարային վիճակում էր, սկսվեց նրա վերանորոգումը, 2012 թվականի սեպտեմբերի 8-ին պայթեցվեց՝ 2014 թվականին նոր կրկես ունենալու պայմանով։ Նախագծի համաձայն՝ կրկեսի գմբեթի բարձրությունը նախկին 16.5 մետրից կհասնի մինչև 21մ։
