Եռակողմ հայտարարության նախնական տարբերակի ապաշրջափակման մասին կետը սրբագրվել է
Ինչ է ենթադրում կոմունիկացիաների ապաշրջափակումը կամ «Զանգեզուրի միջանցքի» հավակնոտ նախագիծը
Կառավարության երեկվա նիստում, Նիկոլ Փաշինյանը, անդրադառնալով կոմունիկացիաների ապաշրջափակմանը՝ հայտարարել է. «Կան հարցեր, որոնք հնարավոր է լուծել ավելի արագ: Հարցեր կան, որոնց լուծումն ավելի երկար ժամանակ է պահանջում, բայց մեր տրամադրվածությունը, կրկնում եմ, պիտի լինի հետևյալը՝ գնալ լուծումների: Նման հարցերից մեկը, որը, կարծում եմ, հնարավոր է բավական արագ լուծել՝ տարածաշրջանային կոմունիկացիաների բացումն է, տարածաշրջանային ապաշրջափակման օրակարգը: Եվ կարծում եմ՝ պետք է օր առաջ վերսկսենք աշխատանքները փոխվարչապետների եռակողմ ձևաչափում և լինենք առավել ակտիվ և նախաձեռնող՝ տարածաշրջանում նոր կոմունիկացիոն և տնտեսական հնարավորությունների իրագործման տեսանկյունից»:
Կառավարության նիստից հետո լրագրողների հետ ճեպազրույցում Տարածքային կառավարման և ենթակառուցվածքների նորանշանակ նախարար Գնել Սանոսյանը իր հերթին նշել է, որ տրանսպորտային ուղիների ապաշրջափակումը վերաբերում է երկու երկրներին, այսինքն, երկու երկրները համաչափ պիտի ապաշրջափակեն տրանսպորտային ուղիները: Իսկ առանց ենթակառուցվածքների կառուցման հնարավոր չէ ունենալ ապաշրջափակում:
«Ունենք հատվածներ, որտեղ երկաթուղու նախկին ցանցը չկա, ենթադրաբար՝ նույն ուղիով է այն վերականգնվելու: Բոլորիս հայտնի է՝ երկաթուղին անցնում է Նախիջևանով, Մեղրիով, խորհրդային տարիներին եղել է նաև Իջևանի ուղղությամբ, տարածաշրջանում խաղաղություն լինելու դեպքում, ենթադրաբար, Իջևանով էլ կարող է անցնել»,- մանրամասնել է նա:
Վերջերս «Ռիա Նովոստին» հոդված էր հրապարակել ապաշրջափակման թեմայով, որտեղ նշվում է, որ Զանգեզուրի միջանցքը հավակնոտ նախագիծ է, սակայն մինչ այսօր դեռ թղթի վրա է: Եվ չկա հստակ պատկերացում, թե ինչ տեսք պիտի ունենա Անդրկովկասի ենթակառուցվածքը:
Մյուս կողմից, լրատվամիջոցի՝ երկաթուղային աշխատակցի հետ զրույցում, ըստ էության, ասվում է այն, ինչ երեկ լրագրողների հետ ճեպազրույցում ասել էր ՀՀ ՏԿԵ նախարար Գնել Սանոսյանը, թե խոսքը Նախիջևանի հին ցամաքային ճանապարհի մասին է՝ ՀՀ-ից դեպի Ադրբեջան և հետո՝ ՌԴ:
Ըստ գործակալության՝ Նախիջևանի ցամաքային ճանապարհը գործել է և խորհրդային ժամանակաշրջանում, սակայն 1980-ականներին, երբ Լեռնային Ղարաբաղի շուրջ իրավիճակը սրվել է, այս երթուղին վտանգավոր է համարվել, և Բաքու-Նախիջևան կարճ այս երթուղին ընդհատվել է:
«Կտրվել է և ճանապարհը նախիջևանյան Շարուր քաղաքից մինչև հայկական Երասխ, որը ուղիղ մուտք էր ապահովում ՀՀ-ից Ռուսաստան: Ընդ որում, Երասխի կայարանից դեպի Իրան ճյուղ կար: Երկաթուղային կապը հայկական Իջևանի և ադրբեջանական ճանապարհատվածի միջև ևս խաթարվել է»,- նշվում է հոդվածում:
Նշենք, որ մոտ երկու շաբաթ առաջ Նիկոլ Փաշինյանը հայտարարել էր, որ Ադրբեջանը Հայաստանով պիտի հաղորդակցություն ունենա դեպի Նախիջևան, Վրաստան, Իրան, Հայաստանը՝ Ադրբեջանով՝ դեպի ՌԴ, Կենտրանական Ասիա ու Իրան:
Ինչ սրբագրում է կատարվել եռակողմ հայտարարության նախնական տարբերակի 9-րդ կետում
Ադրբեջանական կողմը նշում է, որ Զանգեզուրի միջանցքն իրենց համար սկզբունքի հարց է՝ պնդելով, որ դրա մասին խոսվում է 2020-ի նոյեմբերի 10-ի եռակողմ հայտարարության մեջ:
Հայաստան-Ադրբեջան-Ռուսաստան նոյեմբերյան համաձայնագրի 9-րդ կետում ասվում է.
«Տարածաշրջանում բոլոր տնտեսական և տրանսպորտային կապերն ապաշրջափակվում են: Հայաստանի Հանրապետությունը երաշխավորում է տրանսպորտային կապերի անվտանգությունը Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև` երկու ուղղություններով քաղաքացիների, տրանսպորտային միջոցների և ապրանքների անխոչընդոտ տեղաշարժը կազմակերպելու համար: Տրանսպորտային հաղորդակցության հսկողությունն իրականացնում են ՌԴ ԱԴԾ Սահմանապահ ծառայության մարմինները»:
Разблокируются все экономические и транспортные связи в регионе. Республика Армения гарантирует безопасность транспортного сообщения между западными районами Азербайджанской Республики и Нахичеванской Автономной Республикой с целью организации беспрепятственного движения граждан, транспортных средств и грузов в обоих направлениях. Контроль за транспортным сообщением осуществляют органы Пограничной службы ФСБ России.
Ինչպես նախկին կետերում, որի մասին գրել է 168.am-ը, 9-րդ կետում ևս սրբագրումներ են եղել, մասնավորապես, եռակողմ հայտարարության նախնական տարբերակում նման ձևակերպում է եղել.
«Տարածաշրջանում բոլոր տնտեսական և տրանսպորտային կապերն ապաշրջափակվում են: Հայաստանի Հանրապետությունը ապահովում է տրանսպորտային հաղորդակցությունը Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև` երկու ուղղություններով քաղաքացիների, տրանսպորտային միջոցների և ապրանքների անխոչընդոտ տեղաշարժը կազմակերպելու համար: Տրանսպորտային հաղորդակցության հսկողությունն իրականացնում են ՌԴ ԱԴԾ Սահմանապահ ծառայության մարմինները»:
Разблокируются все экономические и транспортные связи в регионе. Республика Армения обеспечивает транспортное сообщение между западными районами Азербайджанской Республики и Нахичеванской Автономной Республикой с целью организации беспрепятственного движения граждан, транспортных средств и грузов в обоих направлениях. Контроль за транспортным сообщением осуществляют органы Пограничной службы ФСБ России.
Ապահովել նշանակում է՝
– Որևէ բանի իրականացման, կենսագործման անհրաժեշտ պայմաններ ստեղծել:
Երաշխավորել՝
– Երաշխավորություն տալ ինչ-որ բանի համար։
Առաջին հայացքից գուցե որոշ դեպքերում երաշխավորելն ու ապահովելը կարելի է հոմանիշներ համարել, բայց տողատակում դրանք նաև այլ գործողություններ են պարունակում: Այսինքն, այլ է, երբ դու ես ստեղծում, կառուցում տրանսպորտային հաղորդակցությունը, որի դեպքում դրա ինչպիսին, ինչ «տեսքով» լինելը դու ես որոշում, այլ հարց է, երբ ընդամենը երաշխավորողի դերում ես հանդես գալիս:
Այսինքն, այլ է, երբ դու ես կառուցում քո տունը, որոշում դրա մասշտաբը, այլ է, երբ ընդամենը երաշխավորում ես՝ չի փլվի:
Իսկ թե ինչ տեսակ անվտանգության երաշխավոր է Հայաստանը գործող իշխանության օրոք, մենք արդեն տեսանք:
