«Վայ էն քաղաքական ուժերին, որոնք ոստիկանությանն օգտագործում են քաղաքական նպատակներով, վայ այն ոստիկանությանը, որն օգտագործվում է քաղաքական ուժերի կողմից. երկուսն էլ պարտվելու են». Վլադիմիր Գասպարյան

Խմբերին, խմբավորումներին պետք չէ բարձրացնել և արժեքավորել, իմաստ չկա: Նրանք, ինչպես խմբեր և խմբակներ կան, պետք է մնան խմբի և խմբակի կարգավիճակում:

Էջմիածնում լրագրողների հետ զրույցում ասաց ՀՀ նախկին ոստիկանապետ Վլադիմիր Գասպարյանը` անդրադառնալով տարբեր խմբերի կողմից Հայ առաքելական եկեղեցու դեմ գործողություններին:

«Ես չեմ կարծում, որ հասարակությունը զոհ կդառնա նման հոգնած տեխնոլոգիաներին, որ հիմա օգտագործում են: Չի լինի այդպիսի բան: Առաքելական եկեղեցին եղել է, կա և մնալու է, և ոչ ոք իրավասու չի, բացի Գերագույն եկեղեցական խորհուրդից, դնել Վեհափառ Հայրապետի հարցը: Վեհափառ Հայրապետը ձեռնադրված է, և ինչ-որ երևույթներ են պահանջում են նրա հարցը, որոնք ինչ-որ ակումբներում իրենց ցնորքներն են շաղ տալիս` Աստվածաշնչի հետ ոչ մի կապ չունենալով, խառնելով Աստվածաշունչը, իրենց սեփական մեկնաբանությունը տալով: Էնպես որ չի լինի այնպես, ինչպես կարծում են: Խմբերը, խմբակները թող մնան իրենց համար իրենց տներում, իրենց հնարած եկեղեցիներում: Հավատը վատ բան չի, բայց այն պետք է ճշմարիտ ճանապարհով լինի: Ճշմարիտ, ճշմարիտ եմ ասում»,- նշեց նա:

Հարցին` Հայ առաքելական եկեղեցու նկատմամբ սպառնալիքներ տեսնու՞մ եք, ՀՀ նախկին ոստիկնապետը պատասխանեց.

«Ես տեսնում եմ նորություններ, որոնց չեմ կարող սպառնալիք գնահատականը տալ: Ես տեսնում եմ տարրական տեխնոլոգիա` մաշված, հոգնած: Եվ չգիտես ինչի էս երիտասարդ իշխանությունը փորձում է հոգնած, բեզարած տեխնոլոգիաններով գործել էսօր: Չի լինի էդպիսի բան: Դուք հասկանո՞ւմ եք ինչի կարող է բերել այս երևույթը, երբ հանկարծ Առաքելական եկեղեցու զավակները որոշեն, որ իրենք էլ պետք է աղանդների դեմ արշավներ կազմակերպեն: Դուք պատկերացնո՞ւմ եք` դա ինչով կարող է ավարտվել: Ուստի խմբակները պետք է հետևություններ անեն, իսկ իշխանությունները դրա սաստող ուժը պետք է լինեն, որպեսզի էդպիսի երևույթներ տեղի չունենան: Չի կարելի բաժանել ազգը, պետք է միաբանել, և ավելի քան այն ժամանակ, երբ սեփական տխմարության արդյունքում տվել ենք հազարավոր մահեր, ունենք տասնյակ հազարից ավելի հաշմանդամ տղաներ, ունեցել ենք հողի, երկրի կորուստ: Չի կարելի տանել տարանջատման: Սա շատ վատ երևույթ է: Եվ իշխանությունն առաջինն ինքը պիտի շահագրգիռ լինի, որ նման երևույթներ չլինեն: Իսկ երբ դա ողջունում է, այդ իշխանությանը պետք է քշել ուղղակի»,- շեշտեց Վլադիմիր Գասպարյանը:

Թե ինչպես է գնահատում ոստիկանության գործողությունները, ՀՀ նախկին ոստիկնապետը նշեց` մեծ հաշվով դրական, իհարկե, որոշակի բացառություններով, որն իրեն մինչև հոգու խորքը վիրավորում է:

«Կարծում եմ, որ ոստիկանության ղեկավարությունը, ղեկավարը, այն ոստիկաններին, որոնք նախաձեռնող ապուշի կերպարում են և գործում են ոչ թե օրենքի սահմաններում, այլ սեփական նախաձեռնությամբ և հիմարությամբ, պետք է շտկի սա: Հակառակ դեպքում շատ կարճ ժամնանակում ատելի կդառնա հասարակության համար, իսկ ատելի ոստիկանությունից չես կարող լավ բան ակնկալել: Ես միշտ ասել եմ` վայ էն քաղաքական ուժերին, որոնք ոստիկանությանն օգտագործում են քաղաքական նպատակներով, վայ այն ոստիկանությանը, որն օգտագործվում է քաղաքական ուժերի կողմից: Երկու կողմն էլ պարտվողական են` և’ իշխանությունն է պարտվելու, և’ ոստիկանությունը, եթե իրար սատարեն սեփական տխմար տեխնոլոգիաներն առաջ տանելով»,- շարունակեց Գասպարյանը:

Դիտարկմանը` վերադարձ կլինի՞ համակարգ, Վլադիմիր Գասպարյանն արձագանքեց` ոչ, տղաներ, ես միշտ ասել եմ, որ 60 տարով եմ եկել, հենց 60 տարեկանս լրացավ, դուք աշխատեք:

«Ես 40 տարվա սպա եմ: Ես իրավունք ունե՞մ մի տասը տարի, քանի դեռ ինքնուրույն քայլելու հնարավորություն ունեմ, մի քիչ էլ ինձ, իմ թոռներին, իմ զավակներին ծառայել: Խորհուրդների , փորձը փոխանցելու առումով միշտ իմ դռները բաց են բոլորի առաջ: Բայց աշխատել… թող հիմա էլ տրակտորն աշխատի, այն մետաղից է»,- եզրափակեց ՀՀ նախկին ոստիկանապետը: