100 լավագույն երիտասարդ ֆուտբոլիստները․ մաս 1

168․am-ի շարքը նվիրված է ֆուտբոլային աշխարհի 100 ամենատաղանդավոր ֆուտբոլիստներին։

Վարկանիշում տեղերի կարգը կախված է մի քանի հանգամանքներից՝ խաղացողի նվաճումները երիտասարդական մակարդակում, վերջին մի քանի մրցաշրջանում խաղացողի մակարդակը և նրա արդյունքները, և այս մրցաշրջանում մարզավիճակը/նվաճումները: Ցանկում ընդգրկված են այնպիսի ֆուտբոլիստներ, ովքեր դեռ 22 տարեկան չեն, ինչպես նաև նրանք, ովքեր կարողացել են հանդես գալ և ապացուցել իրենց մեծահասակների մակարդակում, ուստի ցանկում ներառված չեն Դանիել Մալդինին, Յուսուֆա Մուկոկոն և Խավի Սիմոնսը:

Նյութի հիմնական նպատակը ընթերցողների համար նոր անուններ բացահայտելն է, ամենահամեստ լիգաներից մինչև թոփ առաջնություններ։ Ինչպես նաև այնպիսի երիտասարդներ, ում անուններն այնքան էլ չեն հիշատակվում մամուլում։ Վարկանիշում կլինեն նաև գերաստղեր, բայց գլխավոր նպատակը հենց դա էր:

Իհարկե, ոչ բոլոր խաղացողները հաջողություն կունենան հետագա կարիերայում, հսկայական թվով փոփոխություններ ազդում են դրա վրա՝ սխալ կամ անհաշվենկատ փոխանցում այլ թիմ, կամ հակառակը՝ մեծ ակումբում լճացում, վնասվածքներ, մարզիչների մշտական փոփոխություններ, անձնական խնդիրներ, անձնական կապրիզներ և այլն։

Վարկանիշը ցույց է տալիս բոլոր պաշտոնական մրցաշարերը, ներառյալ՝ եվրոպական գավաթներն ու ազգային գավաթները, փակագծերում՝ դաշտում անցկացրած րոպեների քանակը:

100․ Կոդի Գակպո

• Երկիր՝ Նիդեռլանդներ
• Ակումբ՝ ՊՍՎ Էյնդհովեն
• Դիրք՝ ձախ կիսապաշտպան
• 21 տարեկան
• Վիճակագրություն՝ 39 հանդիպում (2294 րոպե), 8 գոլ, 9 գոլային փոխանցում

Գակպոն ՊՍՎ-ի սան է, հանդես է գալիս Նիդեռլանդների երիտասարդական հավաքականում, դեռևս չի ընդգրկվել մեծահասակների թիմում: Նա հիմնականում խաղում է ձախ եզրին, բայց երբեմն խաղում է նաև աջից և անգամ հարձակման կենտրոնում: Նրա համար սա մեծահասակների ֆուտբոլի երկրորդ մրցաշրջանն է, և եթե անցյալում նա առաջին իսկ րոպեներից մի քանի անգամ միայն հայտնվեց դաշտում, ավելի հաճախ`վերջում, ապա այս մրցաշրջանում, հիմնական աստղ Լոսանոյի հեռանալուց հետո, նա սկսեց ավելի հաճախ խաղալ մեկնարկային կազմում: Ձմռանը Գաստոն Պերեյրան և Սթիվեն Բերգվայնը հեռացան թիմից՝ վերջապես ազատելով տեղ Գակպոյի համար, որից նա օգտվեց՝ գոլ խփելով առաջնության վերջին երեք խաղերում:

99․ Բրիեն Մբեմո

• Երկիր՝ Ֆրանսիա
• Ակումբ՝ «Բրենթֆորդ»
• Դիրք՝ աջ կիսապաշտպան
• 20 տարեկան
• Վիճակագրություն՝ 38 հանդիպում (2671), 15 գոլ, 7 գոլային փոխանցում

Ընթացիկ առաջնությունում Չեմպիոնշիպի գլխավոր հայտնագործություններից մեկը: Ֆրանսիայի երկրորդ լիգայում աչքի ընկնելուց հետո ամռանը Մբեմոն տեղափոխվեց «Բրենթֆորդ»՝ վեց միլիոն եվրոյով, որտեղ նա անմիջապես դարձավ հարձակման աջ թևի հիմնական խաղացողներից։

98․ Էրիկ Գարսիա

• Երկիր՝ Իսպանիա
• Ակումբ` «Մանչեսթեր Սիթի»
• Դիրք՝ Կենտրոնական պաշտպան
• 19 տարեկան
• Վիճակագրություն՝ 11 հանդիպում (718), 1 գոլային փոխանցում

Անգլիա տեղափոխվելուց առաջ Գարսիան 9 տարի անցկացրեց Բարսելոնայի «Լա Մասիայում»: Անցած մրցաշրջանում նա ԱՊԼ-ի գավաթի խաղարկությունում անցկացրել է երեք հանդիպում, իսկ նախքան մրցաշրջանի մեկնարկը տեղափոխվել է հիմնական թիմ: Իր հետաքրքրասիրությամբ Գարսիային Գվարդիոլան նմանեցնում է Բուսկետսին։ Գվարդիոլայի խոսքով՝ միայն նա էր այդքան հարցեր տալիս և սիրում էր խոսել մարտավարության մասին: «Ուոթֆորդի» հետ խաղից առաջ Գարսիան նախավարժանքից հետո ասաց Պեպին, որ մրցակիցը կսկսի խաղալ չորս պաշտպանով: Խաղից հետո Գվարդիոլան մի քանի հաճոյախոսություններ է ասել նրա հասցեին. «Նա աներևակայելի խելացի տղա է: Նա ամեն ինչ գիտի ընդհանրապես: Այսօր մենք կասկածներ ունեինք կազմի վերաբերյալ։ Արդյո՞ք նրանք կխաղան 4 կամ 5 պաշտպաններով։ Էրիկը նախավարժանքից հետո եկավ ինձ մոտ և ասաց, որ նրանք որոշակի շարժումներ են մշակել, և չորս պաշտպանով կխաղա»:

«Բարսելոնայում» և «Մանչեսթեր Սիթիում» Գարսիան երիտասարդական բոլոր թիմերի ավագն էր և արդեն սովորում է մարզիչ դառնալու համար:

97․ Օվեն Վեյնդալ

• Երկիր՝ Նիդեռլանդներ
• Ակումբ՝ ԱԶ Ալկմար
• Դիրք՝ ձախ պաշտպան
• 20 տարեկան
• Վիճակագրություն՝ 39 հանդիպում (3475), 1 գոլ, 8 գոլային փոխանցում

Վեյնդալն անցավ ԱԶ Ալկմարի երիտասարդական թիմերի բոլոր փուլերը և առաջին թիմում խաղաց 16 տարի 5 օրական հասակում՝ դառնալով ակումբի պատմության ամենաերիտասարդ դեբյուտանտը: Բայց իսկական առաջխաղացումը տեղի ունեցավ միայն այս մրցաշրջանում: Հիմա նրա երազանքը «Ռեալի» կազմում խաղալն է: Վեյնդալի գործակալը Մինո Ռայոլան է, ով կարող է շատ լավ օգնել նրան: Ռայոլան աշխատում է այնպիսի ֆուտբոլիստների հետ, ինչպիսիք են Հենրիխ Մխիթարյանը, Պոլ Պոգբան, Զլատան Իբրահիմովիչը և այլք։

96․ Սեբաստիանո Էսպոզիտո

• Երկիր՝ Իտալիա
• Ակումբ՝ «Ինտեր»
• Դիրք՝ հարձակվող
• 17 տարեկան
• Վիճակագրություն՝ 11 հանդիպում (281), 1 գոլ

11 տարեկանում Էսպոզիտոյին նկատեցին «Ինտերի» սկաուտները և նրան բերեցին «Բրեշիայի» երիտասարդական հավաքականից: «Ինտերում» սկսեցին խոսել նրա մասին նախորդ մրցաշրջանում, երբ Սեբաստիանոն իր տարիքային կարգի 18 խաղերում խփեց 23 գոլ: Նա մրցաշրջանի երկրորդ կեսն անցկացրեց 19 տարեկանների թիմում, և նաև կարողացավ իր դեբյուտն իրականացնել Եվրոպայի լիգայում՝ հիմնական թիմի կազմում:

Այս մրցաշրջանում Կոնտեն հիմնականում փոխարինում է Էսպոզիտոյին։ Չեմպիոնների լիգայում դեբյուտը տեղի ունեցավ «Բորուսիայի» հետ խաղում, որտեղ նա վաստակեց 11 մետրանոց հարված։

95․ Բրենդոն Ուիլիամս

• Երկիր՝ Անգլիա
• Ակումբ՝ «Մանչեսթեր Յունայթեդ»
• Դիրքը՝ ձախ պաշտպան
• 19 տարեկան
• Վիճակագրություն՝ 26 հանդիպում (1768), 1 գոլ, 2 գոլային փոխանցում

Յոթ տարեկան հասակում Բրենդոնն ընդունվեց «Մանչեսթեր Յունայթեդի» ակադեմիա և հաջորդաբար անցավ պատանեկան և երիտասարդական հավաքականների բոլոր փուլերը: Նա այս մրցաշրջանում իր նորամուտը իրականացրեց սեպտեմբերին «Ռոչդեյլի» դեմ գավաթային խաղում, մեկ շաբաթ անց նա խաղադաշտ դուրս եկավ Եվրոպա լիգայի՝ ԱԶ Ալկմարի հետ խաղում, իսկ երկու ամիս անց նա մեծահասակների ֆուտբոլի առաջին գոլը խփեց «Շեֆիլդ Յունայթեդի» դեմ խաղում:

94․ Պեդրի

• Երկիր՝ Իսպանիա
• Ակումբ՝ Լաս Պալմաս
• Դիրք՝ ձախ կիսապաշտպան
• 17 տարեկան
• Վիճակագրություն՝ 27 հանդիպում (2255), 3 գոլ, 4 գոլային փոխանցում

Պեդրիի իրավունքները պատկանում են «Բարսելոնային», որն անցած տարվա սեպտեմբերին փոխհատուցում էր վճարել 5 միլիոն եվրոյի չափով և դեռահասի հետ երկամյա պայմանագիր էր կնքել՝ գրանցելով 400 միլիոն եվրոյի չափով դրույթ, եթե խաղացողը խաղա «Բարսելոնայի» հիմնական թիմում:

Իսպանացին սկսեց իր ճանապարհորդությունը փոքրիկ «Հուվենթուդ Լագունա» թիմում, 2017-ին նա փորձաշրջան անցավ «Թենրիֆեի» երիտասարդական կազմում, բայց նրանք հրաժարվեցին նրանից՝ հաշվի առնելով այն փաստը, որ Պեդրին չափազանց փոքր էր և նիհար: Մեկ տարի անց երիտասարդ տաղանդը տեղափոխվեց «Լաս Պալմասի» երիտասարդական թիմ, որտեղ նրան անմիջապես նկատեց գլխավոր մարզիչ Պեպե Մելը և խնդրեց տեղափոխվել նրան հիմնական թիմ: Պեդրին լավ է հարմարվում կիսապաշտպանության բոլոր դիրքերում և ցանկանում է նմանվել իր կուռք Անդրես Ինիեստային։

93․ Վիտալի Միկոլենկո

• Երկիր՝ Ուկրաինա
• Ակումբ՝ Կիևի «Դինամո»
• Դիրք՝ ձախ պաշտպան
• 21 տարեկան
• Վիճակագրություն՝ 32 հանդիպում (2832), 4 գոլ, 7 գոլային փոխանցում

Ուկրաինայի գլխավոր տաղանդը հենց հիմա, ազգային հավաքականի հիմնական ձախ պաշտպանը և շատ լավ տարբերակ եվրոպական շատ ակումբների համար: Առաջխաղացումը տեղի է ունեցել անցած մրցաշրջանում, երբ Միկոլենկոն գրավեց տեղն առաջին թիմում և առաջին գոլը խփեց իր պրոֆեսիոնալ կարիերայում՝ Եվրոպա լիգայի «Ռենեսի» դեմ խաղում:

92․ Նյանզու Քուասի

• Երկիր՝ Ֆրանսիա
• Ակումբ՝ ՊՍԺ
• Դիրք՝ կենտրոնական պաշտպան
• 18 տարեկան
• Վիճակագրություն՝ 13 հանդիպում (905), 3 գոլ, 1 գոլային փոխանցում

Մեկ տարի առաջ Le Parisien թերթը Քուասիին անվանեց տարվա լավագույն երիտասարդ խաղացող, և կարծես նախադրյալներ կան. 17-ամյա ֆուտբոլիստը այս մրցաշրջանում ինն անգամ դուրս եկավ ՊՍԺ-ի հիմնական կազմում՝ երկու անգամ գոլ խփելով: Քուասին ՊՍԺ-ի երիտասարդական հավաքականների մեծ մասի ավագն էր և ակնհայտորեն գերազանցում էր իր հասակակիցներին նախորդ մրցաշրջանում, երբ նրան մարզում էր փարիզցիների նախկին խաղացող Տիագո Մոտտան:

91․ Մատվեյ Սաֆոնով

• Երկիր՝ Ռուսաստան
• Ակումբ`Կրասնոդար
• Դիրք՝ դարպասապահ
• 21 տարեկան
• Վիճակագրություն՝ 27 հանդիպում (2430), 7 չոր հանդիպում

Կրասնոդարի ֆուտբոլիստը հայտնի դարձավ անցյալ տարվա գարնանը, երբ շքեղ խաղաց «Զենիթի» դեմ խաղում և 8 սեյվ արեց: Աշնանը նրանք սկսեցին վստահել Սաֆոնովին հիմնական կազմում, բայց շրջադարձային դարձավ ապրիլյան հանդիպումը «Զենիթի» հետ, որից հետո նա սկսեց մշտապես խաղալ հիմնական կազմում: Այս մրցաշրջանում երիտասարդ դարպասապահը բաց թողեց լիգայում միայն մեկ հանդիպում՝ վերջնականապես հիմնական կազմից դուրս մղելով Ստանիսլավ Կրիթսյուկին: Միևնույն ժամանակ, նա դեռ չի ներգրավվել Ռուսաստանի հավաքականի կազմում, բայց մեկնարկում է երիտասարդական հավաքականի հիմնական կազմում։

90․ Տետե

• Երկիր՝ Բրազիլիա
• Ակումբ՝ Դոնեցկի «Շախտյոր»
• Դիրք՝ աջ կիսապաշտպան
• 20 տարեկան
• Վիճակագրություն՝ 28 հանդիպում (1617), 5 գոլ, 4 գոլային փոխանցում

Տետեն անցյալ ձմռանը տեղափոխվեց «Շախտյոր»՝ 15 միլիոն եվրոյի դիմաց: «Շախտյորն» այդքան գումար չի ծախսել մեկ խաղացողի վրա 2013 թվականի ամռանից, երբ գնեցին Ֆրեդին և Բեռնարին:

Նա արդեն համեմատվում է Ալեքս Թեյշերիայի և Դուգլաս Կոստայի հետ, և նրա ուժեղ կողմերը ներառում են գնդակի հետ գերազանց աշխատանք և արագություն։

89․ Էբերեչի Էզե

• Երկիր՝ Անգլիա
• Ակումբ՝ Քուինս Պարկ Ռեյնջերս
• Դիրք՝ հարձակվողական կիսապաշտպան
• 21 տարեկան
• Վիճակագրություն՝ 39 հանդիպում (3393), 12 գոլ, 8 գոլային փոխանցում

Էզեն Չեմպիոնշիպի ամենաակնառու խաղացողներից մեկն է։ Քուինս Պարկ Ռեյնջերսի հարձակման գրեթե ամբողջ ստեղծագործական ներուժը կախված է նրանից: Չնայած իր երիտասարդ տարիքին, նա արդեն խաղացել է վեց տարբեր ակումբներում (չնայած դրանցից չորսը կրտսեր կամ երիտասարդական են): Էզեն մտավ մեծահասակների ֆուտբոլ արդեն Քուինս Պարկ Ռեյնջերսում։

Այս մրցաշրջանում զգալի առաջընթաց է գրանցվել: Ձմռանը Քուինս Պարկ Ռեյնջերսը հազիվ պահեց իր առաջատարին: Ամառային տրանսֆերային պատուհանի ընթացքում նա, ամենայն հավանականությամբ, կլքի ակումբը։

Շարունակելի․․․

Սիրարփի Աղաբաբյան