Գագիկ Ծառուկյանը դուրս եկավ դատարանի շենքից. նիստը կշարունակվի վաղը
«Բարգավաճ Հայաստան» կուսակցության նախագահ Գագիկ Ծառուկյանը դուրս եկավ Երևանի ընդհանուր իրավասության դատարանի Շենգավիթի նստավայրից։ Վերջինս հրաժարվեց պատասխանել լրագրողների հարցերին՝ նշելով, որ փաստաբանները կխսեն:
Նրա պաշտպաններից Երեմ Սարգսյանը լրագրողների հետ զրույցում հայտնեց, որ իրենք խնդրել են հետաձգել նիստը, քանի որ նոր են ներգրավվել որպես պաշտպաններ և ժամանակ է պետք, որպեսզի կարողանան ծանոթանալ քրեական գործին։
Փաստաբանը նշեց, որ դատական նիստը կշարունակվի վաղը՝ ժամը 16:30-ին:
«Վաղվա նիստից հետո, կախված իրավիճակից, կպատասխանենք ձեզ հուզող հարցերին: Այս պահին գործի նյութերից որեւէ տվյալ չունենք, որպեսզի պատասխանենք այլ հարցերի»,- ասաց փաստաբանը՝ հավելելով, որ ըստ էության, այսօր քննություն տեղի չի ունեցել:
