«Ռեալը» պլանավորում է վերսկսել մարզումները մայիսի 4-ից
«Ռեալը», հնարավոր է, շուտով վերսկսի մարզումները: Marca-ի փոխանցմամբ, «Ռեալը» նախատեսում է վերսկսել ամբողջական մարզումները մայիսի 4-ին: Դրանք կանցկացվեն «Վալդեբեբաս» ակումբի բազայում:
Նշվում է, որ ակումբը հատուկ նախազգուշական միջոցներ կձեռնարկի. Նախ` «Ռեալի» բոլոր խաղացողները թեստեր կանցնեն կորոնավիրուսի համար, իսկ մարզումներից հետո նրանք պետք է որքան հնարավոր է՝ շուտ գնան տուն, որպեսզի հնարավոր լինի նվազագույնի հասցնել կապերը բազայի և ակումբի աշխատակիցների հետ:
Հիշեցնենք, որ «Վալդեբեբասում» գտնվող բազան փակվել է մարտի 12-ից, երբ «Ռեալի» բասկետբոլի խաղացողներից մեկի մոտ հայտնաբերվել էր կորոնավիրուս:
«Ռեալը» երկրորդ տեղում է Լա Լիգայի մրցաշարային աղյուսակում՝ հետ մնալով առաջատար «Բարսելոնայից» երկու միավորով:
Սիրարփի Աղաբաբյան
