«Հեռուստատեսության և ռադիոյի մասին նոր օրենքն անհրաժեշտություն է, գաղափարներ արդեն կան». Վահագն Թևոսյան
Լրագրողական երեք կազմակերպությունների մշակած և հուլիսից շրջանառության մեջ դրված «Հեռուստատեսության և ռադիոյի մասին» նոր օրինագիծն ԱԺ չի մտնի, փոխարենը՝ կգրվի նորը: Այս մասին «Հեռուստատեսության և ռադիոյի մասին» նոր օրինագծի սկզբունքների մասին քննարկման ժամանակ հայտնեց ԱԺ «Իմ քայլը» խմբակցության պատգամավոր Վահագն Թևոսյանը: Ժուռնալիստների միության նախագահ Սաթիկ Սեյրանյանը հետաքրքրվեց, թե ինչո՞ւ հենց հիմա առաջացավ օրենքը փոխելու անհրաժեշտությունը, երբ առջևում է հեռուստաընկերությունների լիցենզավորման նոր մրցույթը:
«Այստեղ կա քաղաքական բաղադրիչ, եթե հանրության կողմից պատվեր չի իջեցվել, հեռուստաընկերությունները, ռադիոընկերությունները պահանջ չեն ներկայացրել: Նախ հայտարարեք, թե ի՞նչ եք ուզում, նպատակը, ձեր սկզբունքները հռչակեք, հետո նոր ճանապարհը հարթենք, թե ինչպե՞ս ենք հասնում այդ նպատակին: Այդ մասին չի հայտարարվում: Տարերային արտահայտություններ են հնչում՝ «Հայաստանը մեր օջախն է», «Քաղաքացի, դուխո՛վ», սրանք ինչե՞ր են, տարերային լոզունգնե՞ր, թե՞ սա է մեր պետական քաղաքականությունը, որ ըստ դրա էլ՝ կոնտենտ ստեղծվի, այս շտապողականությունը պայմանավորված էր լիցենզիաների սպասվող մրցույթներով, ում կտան, ում չեն տա»,- ասաց Սաթիկ Սեյրանյանը:
ԱԺ «Իմ քայլը» խմբակցության պատգամավոր Վահագն Թևոսյանը համաձայն չէ, որ հանրային պահանջ չկա, վստահեցնում է՝ լրագրողական կազմակերպություններն օրենքի նախագիծը ներկայացրել են սեփական նախաձեռնությամբ: Նոր օրենքը, ըստ պատգամավորի, անհրաժեշտություն է, քանի որ հիմա գտնվում ենք այլ իրականության մեջ, երբ կարիք կա կարգավորելու աուդիո-վիզուալ ծառայությունների մատուցումը:
«Այն, որ հանրային պահանջարկ չկա, չափազանցված է: Շահառուները միայն վերգետնյա հեռարձակման հեռուստաընկերությունները և ռադիոընկերությունները չեն, դրանք ցանցային և մալուխային օպերատորներն են, աուդիո-վիզուալ ծառայություններ մատուցող ընկերություններն են ու հեռուստադիտողները: Մենք թևակոխել ենք աուդիո-վիզուալ ծառայությունների մատուցման նոր իրականություն, այս պարագայում կա որոշակի անհամաչափություն և՛ ներկայացված պահանջների, և՛ վերահսկողության մեխանիզմների, և՛ ֆինանսական ադեկվատ ակնկալիքների առումով»,- ասաց Վահագն Թևոսյանը:
Հունվարից քննարկման կդրվի նոր օրենքի նախագիծ, ասում է «Իմ քայլը» խմբակցության պատգամավորը՝ հավելելով, որ գաղափարներ արդեն կան: Սկսելու են հայեցակարգի մշակումից: Օրինագիծը ներկայացնելու է «Իմ քայլը» խմբակցությունը, հետևաբար՝ պատասխանատվությունը ևս իրենցն է լինելու:
