Լեհաստանը 7 մլն դոլար կծախսի Ռուսաստանի հետ սահմանի ամրապնդման համար
Լեհաստանն արդիականացնում է Ռուսաստանի հետ սահմանի պահպանության համակարգը. նախագծի համար հատկացվել է 7 միլիոն դոլար՝ հիմնականում Եվրամիության ֆինանսավորմամբ: Այս մասին հաղորդել է Լեհաստանի սահմանապահ ծառայությունը։
«Նախագծի նպատակն է բարելավել սահմանապահ ծառայության հսկողության հնարավորությունները Ռուսաստանի Դաշնության հետ Եվրոպական միության արտաքին սահմանի վրա՝ ցանցային և հեռահաղորդակցության ենթակառուցվածքների արդիականացման, անվտանգության բնագավառում նոր լուծումների ներդրման և աշխատակիցների համար շարժական լուծումների մշակման ուղիով»,- ասվում է հայտարարության մեջ։
Ներդրումների ընդհանուր ծավալը կկազմի շուրջ 25 մլն 850 հազար զլոտի, որը կազմում է շուրջ 7 մլն ԱՄՆ դոլար։ Այս գումարից ԵՄ-ն Սահմանների ինտեգրված կառավարման հիմնադրամի շրջանակներում կհատկացնի գրեթե 6,3 միլիոն դոլար կամ ընդհանուր գումարի 90%-ը։
«Նախագիծը թույլ կտա բարձրացնել սահմանային հսկողության համակարգերի արդյունավետությունն ու անվտանգությունը, կբարելավի ՏՏ ենթակառուցվածքների կայունությունը, կապահովի դաշտային ստորաբաժանումներում կառավարման ու կապի անընդհատականությունը, կբարձրացնի անվտանգության համակարգերի սպասարկման ու զարգացման համար պատասխանատու անձնակազմի որակավորումը», – նշվում է սահմանապահ ծառայության հայտարարության մեջ։
