ՀՀ քաղաքացիներին Հայաստան տեղափոխող ավտոբուսը, որը Վերին Լարսում կանգնեցվել էր ուղևորների հարցաքննության պատճառով, շարժվել է դեպի Երևան

Վերին Լարսում գտնվող ՀՀ քաղաքացիներին Հայաստան տեղափոխող ավտոբուսը մեկնարկել է երթը դեպի Երևան։ Տեղեկությունը հրապարակվել է Վրաստանում Հայաստանի դեսպանության ֆեյսբուքյան էջում:

Հիշեցնենք, որ ավտոբուսի ուղևորներից 3-ը ձերբակալվել էին արգելված բեռ տեղափոխելու պատճառով: «Սպուտնիկ-Վրաստան» գործակալության տեղեկություններով` ՀՀ քաղաքացիները փորձել են թմրանյութ` կոկաին և հաշիշ տեղափոխել: Նրանք ձերբակալվել են Կազբեկի անցակետում:

Ավելի վաղ դեսպանությունը հայտնել էր, որ Վերին Լարսում գտնվող ավտոբուսի բոլոր ուղևորները հարցաքննվել են։ Վրաստանի իրավապահ մարմինների հաղորդմամբ, ձերբակալվել է ՀՀ 3 քաղաքացի։ Այժմ ընթանում է նախաքննություն և հետագա զարգացումների վերաբերյալ դեսպանությունը հանդես կգա հավելյալ հայտարարություններով։

Վրաստանում Հայաստանի դեսպանությունից տեղեկացրել էին նաև, որ դեսպանության դիվանագետները սնունդ և առաջին անհրաժեշտության պարագաներ էին տարել այնտեղ գտնվող ՀՀ քաղաքացիներին։

https://www.facebook.com/ArmEmbGeorgia/videos/707746256380629/?t=0