Աբեն Ճապոնիայի վարչապետի պաշտոնում գտնվելու տևողության ռեկորդ է սահմանել
Սինձո Աբեն Ճապոնիայի վարչապետի պաշտոնում գտնվելու տեւողության ռեկորդ է սահմանել երկրի ողջ պատմության ընթացքում։ Նա երկրի կառավարությունը գլխավորում է արդեն 2887 օր, եթե հաշվենք նրա ղեկավարության ներքո նախարարների առաջին կաբինետը 2006-2007 թվականներին: Նոյեմբերի 20-ի առավոտյան վարչապետը լրագրողների առջեւ ամփոփել է այդ պաշտոնում իր գործունեության արդյունքները:
Աբեն զբաղեցնելու է Ճապոնիայի կառավարող Լիբերալ-դեմոկրատական կուսակցության ղեկավարի պաշտոնը, որը նրան իրավունք է տալիս երկրի կառավարությունը գլխավորել մինչեւ 2021 թվականի սեպտեմբեր:
«Կուսակցության նախագահի պաշտոնում ինձ մնացել է եւս երկու տարի: Ես մտադիր եմ բոլոր ուժերը ներդնել քաղաքական խնդիրները լուծելու համար»,-ընդգծել է վարչապետը:
Կարեւորագույն խնդիրների թվում նա նշել է երկրի դուրս գալը գնանկումից, ծնելիության կրճատման խնդիրների լուծումը, պատերազմից հետո չլուծված մնացած դիվանագիտական խնդիրները, ինչպես նաեւ երկրի Սահմանադրության բարեփոխումը, հաղորդել է ՌԻԱ Նովոստին:
