«Ազգային ժողովը Սահմանադրական դատարանի նախագահին պաշտոնանկ անելու գործընթաց չի կարող սկսել». Գևորգ Պետրոսյանը` Լիլիթ Մակունցին

Քիչ առաջ Ազգային ժողովի «Իմ քայլը» իշխող խմբակցության ղեկավար Լիլիթ Մակունցն իր ֆեյսբուքյան էջում գրել էր. «Քիչ առաջ ԱԺ «Իմ քայլը» խմբակցությունը որոշեց ՍԴ անդամ Հրայր Թովմասյանի լիազորությունները դադարեցնելու գործընթաց սկսել»։

168.am-ը ԱԺ «Բարգավաճ Հայաստան» խմբակցության պատգամավոր, մասնագիտությամբ իրավաբան Գևորգ Պետրոսյանից փորձեց ճշտել այդ գործընթացի իրավական մեխանիզմները։

«Ազգային ժողովը որևէ լծակ չունի Սահմանադրական դատարանի նախագահի գործընթաց սկսելու, որովհետև ՍԴ նախագահի` պաշտոնից ազատման հիմքերը սպառիչ թվարկված են «Սահմանադրական դատարանի մասին» ՀՀ օրենքում, և ամենամեծ ցանկության դեպքում այդ հիմքերը չեն կարող ընդարձակվել մասնավոր անձանց ցանկությամբ»,- ասաց Գևորգ Պետրոսյանը։

Վերջինս կարծում է, որ, եթե կա Սահմանադրական դատարանի վերաբերյալ դժգոհություն, դա պետք է օրենքով սահմանված ընթացակարգերով անցնի։

«Այսօր Ազգային ժողովը, չնայած որ մասնակցում է ՍԴ անդամների մի մասի ձևավորմանը, այնուամենայնիվ, այդպիսի լծակ չունի։ Եթե մենք այսօր որևէ բան հնարենք, որ կարողանանք Ազգային ժողովի միջոցով ճնշել ՍԴ-ին, սա նշանակում է, որ մենք ուղղակի անտեսում, արհամարհում ենք դատական անկախ համակարգ ունենալու մեր ցանկությունը։ Այն, ինչի մասին ոչ ոք առիթը բաց չի թողնում խոսել ` սկսած երկրի թիվ մեկ պաշտոնյայից մինչև վերջին քաղաքացին»,- նշեց ԱԺ պատգամավորը։

Մեր այն հարցին, թե սա կարո՞ղ ենք համարել ոչ թե Լիլիթ Մակունցի անձնական ցանկությունը, այլ խմբակցության քաղաքական որոշում կամ դիրքորոշում, Գևորգ Պետրոսյանն ասաց, որ ինքը չի կարող ասել, իրեն իրավունք չի վերապահի կարծիք հայտնել` ինչ է դա։

«Ես չգիտեմ, թե ո՞վ է դա որոշել, բայց ով էլ որ որոշված լինի, Ազգային ժողովը Սահմանադրական դատարանի նախագահին պաշտոնանկ անելու գործընթաց չի կարող սկսել։ Ես` որպես պառլամենտական, կուզենայի, որ մենք այդպիսի իրավասություն ունենայինք, որովհետև ընդհանուր առմամբ դա կտեղավորվեր խորհրդարանական վերահսկողության ինստիտուտի շրջանակներում, բայց մենք այսօր այդպիսի իրավասություն չունենք։ ՀՀ Սահմանադրության 6-րդ հոդվածը հստակ սահմանում է, որ բոլոր պետական մարմինները, տեղական ինքնակառավարման մարմինները, պաշտոնատար անձինք իրավասու են իրականացնել միայն այնպիսի գործողություններ, որոնց համար լիազորված են Սահմանադրությամբ կամ օրենքով։ Ոչ Սահմանադրությունը, ոչ էլ որևէ օրենք Ազգային ժողովին չի վերապահում ՍԴ նախագահի պաշտոնանկության գործընթաց նախաձեռնելու իրավասությամբ»,- եզրափակեց Գևորգ Պետրոսյանը։

Գոհար Սավզյան