Նեյմարը համոզված է, որ ՊՍԺ-ն վրեժ է լուծում
Նեյմարը շատ է բարկացել, երբ իմացել է, որ «Բարսելոնայի» և ՊՍԺ-ի բանակցությունները դադարեցվել են, և, որ նա պետք է մնա Փարիզում գոնե մինչև հունվար: Հիշեցնենք, որ հաջորդ ամռանը Նեյմարը կարող է հեռանալ, եթե ակումբներից որևէ մեկը վճարի մոտ 170 միլիոն եվրո:
Նեյմարի շրջապատը պատմել է, որ բրազիլացին արդեն սպառված է, ինչպես նախկինում: Բրազիլացին դեռևս դժգոհ է ղեկավարության որոշումից՝ «Բարսելոնա» տեղափոխումը շրջափակելու համար, հաշվի առնելով, որ բոլոր պայմանները բավարարվել են՝ 150 միլիոն եվրո, այդ թվում՝ 20 միլիոն եվրո Նեյմարի գրպանից, գումարած՝ Իվան Ռակիտիչը, Ժան-Կլեր Տոդիբոն և Ուսման Դեմբելեն՝ վարձավճարով:
SPORT թերթը պարզել է, որ Նեյմարը հիասթափության և զայրույթի խառնուրդ է զգում այն բանից հետո, երբ նա հասկացել է, որ ՊՍԺ-ի պահվածքի միակ նպատակը հարձակվողին պատժելն է: Սա Նասեր Ալ-Հելիֆի (ՊՍԺ-ի նախագահ) որոշումը բացատրելու միակ միջոցն է, քանի որ այն ոչ մի հիմնավորում չունի, ոչ սպորտային տեսանկյունից (հաշվի առնելով հանդերձարանում տիրող մթնոլորտը), ոչ էլ ֆինանսական տեսակետից, քանի որ ամբողջ գործարքն արժեցել է ավելի քան 200 միլիոն եվրո:
Սկզբում ՊՍԺ-ն հասկացրեց, որ խաղացողը վաճառքի չի հանվել, և պայմանագրում փոխհատուցում չկա, բայց Նեյմարը համոզված էր, որ տրանսֆերային պատուհանի վերջին րոպեին ակումբը թույլ կտա իրեն վերադառնալ «Կամպ Նոու»:
«Ես ուզում եմ տեսնել այս թիմում խաղացողների, ովքեր պատրաստ են ամեն ինչ տալ ակումբի համար, պաշտպանել այս շապիկի պատիվը և աջակցել այս ակումբի նախագծին:
Նրանց հետ, ովքեր չեն ցանկանում դա անել կամ չեն հասկանում դրա նպատակը, մենք հանդիպում ենք և շփվում: Կան պայմանագրեր, որոնք պետք է հարգվեն, բայց մեր գերակայությունն այժմ տրվում է մեր նախագծին:
Ոչ ոք Նեյմարին չի խնդրել պայմանագիր ստորագրել: Ոչ ոք չի ստիպել նրան անել դա: Նա եկել է ՊՍԺ՝ լավ հասկանալով ամեն բան, ինչի համար նա անում է դա»,- ասել է ֆրանսիական ակումբի նախագահը:
Նեյմարը չէր սպասում նրան, ինչ եղավ: ՊՍԺ-ն հրամայեց խաղացողին մնալ Ֆրանսիայում իր կամքին հակառակ, գոնե մինչև ձմեռային տրանսֆերային պատուհանը: Սա է Նեյմարի զայրույթի պատճառը:
Նեյմարը ապշած է: Նա չկարողացավ ստիպել ՊՍԺ-ին՝ չնայած գիտի, որ «Բարսան» բավարարել է ՊՍԺ-ի բոլոր ֆինանսական պահանջները: Սա Նեյմարի համար նույնիսկ ավելի հիասթափեցնող է:
Մայիսին, երբ Նեյմարը մեկնել էր Բրազիլիայի հավաքական՝ նախապատրաստվելու Ամերիկայի գավաթին, նա ակումբին ասաց, որ ցանկանում է հեռանալ: Նա իր ցանկության մասին պատմեց թիմակիցներին, մարզչին և մարզական տնօրենին (Անտերո Էնրիկեին, իսկ հետո՝ նաև Լեոնարդոյին): Միակ պատասխանը, որ նա ստացավ, Ալ-Հելիֆիի հանրային հաղորդագրությունն էր և ակումբի հերքումը՝ «Բարսելոնայի» հետ բանակցություններ վարելու մասին:
Փարիզում մնալը հարված է Նեյմարի համար, ով հույս ուներ վերսկսել կարիերան «Բարսելոնայում»: ՊՍԺ-ից հեռանալը կդադարեցներ երկու դժվարին տարիները, քանի որ խաղացողը չէր հասնում իր նպատակներին: Նա Չեմպիոնների լիգայում հաղթանակի չհասավ, և նույնիսկ մոտ չէր «Ոսկե գնդակը» նվաճելուն:
Սա Նեյմարի համար ամենադժվար ամառն էր: Նախ, նա ստիպված էր լուծել խնդիրները իր դեմ բռնաբարության մեղադրանքների հետ: Այնուհետև նա վնասեց կոճը և բաց թողեց Ամերիկայի գավաթում հաղթանակը, իսկ երկար սպասված վերադարձը «Կամպ Նոու» չկայացավ:
Սիրարփի Աղաբաբյան
