«Ունենք 2 խոշոր արտադրողներ ու որոշել ենք էս երկու խոշոր արտադրողներին ասենք՝ փակվեք հըլը շուտ: Էսի մոտեցում ա՞»
Այսօր ԱԺ Տնտեսական հարցերի մշտական հանձնաժողովում բուռն քննարկում ծավալվեց ցեմենտի տուրք սահմանող «Պետական տուրքի մասին» ՀՀ օրենքում և կից ներկայացված օրենքի նախագծում լրացում կատարելու մասին օրենքների նախագծի փաթեթի շուրջ: ՀՀ տնտեսական զարգացման և ներդրումների նախարար Տիգրան Խաչատրյանը ներկայացրեց, որ առաջինից երկրորդ ընթերցում կառավարությունը փոփոխություն է կատարել նախագծում և ներկրվող ցեմենտի տուրքը 22 հազար դրամի փոխարեն՝ այժմ առաջարկում է սահմանել 14 հազար դրամ, սակայն կլինկերի վրա պետտուրք չի սահմանվում:
«Բարգավաճ Հայաստան» խմբակցության պատգամավորները կրկին բողոքեցին կլինկերի կապակցությամբ: Արտյոմ Ծառուկյանը նշեց, որ ԲՀԿ-ն աշխատանքային քննարկմանը չի մասնակցել, և ողջ պատասխանատվությունն իշխանության վրա է: Նա զարմանք արտահայտեց, որ ցեմենտի վրա տուրքը 40% նվազեցվել է, իսկ կլինկերի վրա չի դրվել:
Հանձնաժողովի նախագահ Բաբկեն Թունյանը տեղեկացրեց, որ իրենց ուսումնասիրությունները ցույց են տվել, որ այս կես տարում ցեմենտի ինքնարժեքն իջել է, և այդ պատճառով է նվազեցվել ներմուծվող ցեմենտի տուրքը.
«Ի սկզբանե ներկայացված է եղել, որ ցեմենտի ինքնարժեքը մեկ տոննայի համար միջինը 36-37 դրամ է, իսկ հիմա պարզվել է, որ ցեմենտի ինքնարժեքը միջինը 29 դրամ է»:
ԲՀԿ-ական Արթուր Դալլաքյանը հայտարարեց, թե այսօրվա քայլերը՝ արտերկրյա «ինչ-որ կլինկեր կոչված հումքը» չհարկելը, սխալ է.
«Մեր ներքին արտադրողի նկատմամբ նման ձևի մոտեցումները լրիվ չհասկացվող երևույթներ է: Էս քայլերով, գալու ա ժամանակը, որ ներքին արտադրող չեք ունենա: Ես կրկնում եմ, պետք է էս հարցին մի քիչ ավելի ուշադիր լինենք: Ունենք 2 խոշոր արտադրողներ ու որոշել ենք էս երկու խոշոր արտադրողներին ասենք՝ փակվեք հըլը շուտ: Էսի մոտեցում ա՞: Էսի մոտեցում չի ընդհանրապես: Պետք ա արտասահմանից ինչ-որ մի հատ հումք բերենք, ներքին արտադրողին նեղացնենք, ներքին արտադրողը նեղվի, նեղվի»:
Ըստ նրա՝ տեղական գործարանները կամ կփակվեն, կամ աշխատողներին կկրճատեն ու կփոխեն աշխատանքի ձևը:
ԲՀԿ-ական Հրանտ Մադաթյանը հիշեցրեց երկրաշարժը, ավերածությունները, ու մարդիկ հայհոյում էին շինարարներին, որ անորակ են կառուցել շենքերը. «Թվերի համար պատասխան տալը հեշտ է, բայց մարդկանց կյանքերի համար շատ դժվար է լինելու: Մեր երկիրը գտնվում է երկրաշարժի գոտում, պետք է մտածենք նաև որակի մասին: Պարսկական ցեմենտը ոչ մի փորձաքննություն չի անցել: Եթե էսօր ոչ ոք պատասխան չտա, վաղը նորից մնալու է մեր խղճներին մեր ժողովրդի էդ տանջանքներն ու ցավերը»:
Պատգամավորները Տ.Խաչատրյանին հարց ուղղեցին՝ վստա՞հ եք, որ ցեմենտի պետտուրքը բարձրացնելու օրենքը չի ճանաչվի հակասահմանադրական:
Նախարարը նշեց, որ իրենց խնդիրն առաջնահերթ աշխատատեղերի կրճատում թույլ չտալն է, նաև օրենքն առայժմ միայն մեկ տարով է. «Պետտուրքը որ փոխենք, չի դառնա հակասահմանադրական, որովհետև նա էլ է օրենք, նա էլ, քննարկում ենք փաթեթով և կիրառում ենք օրենքի փոփոխությամբ»:
«Լուսավոր Հայաստան» խմբակցության պատգամավոր Մանե Թանդիլյանի խոսքով՝ Սահմանադրությամբ չի կարելի վատթարացնող նորմը ներդնել, և այս նախադեպը շատ բացասական է լինելու մեր ներդրումային մթնոլորտի համար:
«Իմ քայլի» պատգամավոր Հայկ Սարգսյանը հակադարձեց, որ մեր տեղական արտադրողները նույնպես ներդրողներ են, և օրենքը միտված է նրանց պաշտպանելու, ու սա լավ ազդակ է մյուս ներդրողների համար:
Հանձնաժողովը դրական եզրակացություն տվեց նախագծին, այն կքննարկվի ԱԺ լիագումար նիստում:
