Վրաստանի նախագահի ընտրությունների երկրորդ փուլը կսկսվի Աֆղանստանից
Վրաստանի նախագահի ընտրությունների երկրորդ փուլը կսկսվի նոյեմբերի 26-ին Աֆղանստանում՝ «Վճռորոշ աջակցություն» խաղաղապահ առաքելությանը մասնակցող վրացի զինվորականների քվեարկությամբ: Այդ մասին ասված է Վրաստանի ԿԸՀ-ի կայքում զետեղված հաղորդագրության մեջ:
Նախագահի ընտրությունների երկրորդ փուլը Վրաստանում կանցկացվի նոյեմբերի 28-ին: Դրան կմասնակցեն անկախ թեկնածու, «Վրացական երազանք-ժողովրդավարական Վրաստան» կառավարող կուսակցության կողմից աջակցվող Սալոմե Զուրաբիշվիլին եւ «Ուժը միասնության մեջ է» միավորված ընդդիմությունից թեկնածու Գրիգոլ Վաշաձեն, որը «Միասնական ազգային շարժում» կուսակցության անդամ է:
Աֆղանստանում նոյեմբերի 26-ին կբացվի երկու ընտրատեղամաս՝ Բահրամի ավիաբազայում եւ Մազարի-Շարիֆի «Մարմալ» ռազմահանգրվանում: Ֆորս-մաժորի դեպքում ընտրությունների ամսաթիվը կարող են տեղափոխել ընդհուպ մինչեւ նոյեմբերի 28: Խոսքն ավազամրրիկի, թռիչքի համար անբարենպաստ եղանակի, պայթյունի կամ ռազմական բարդ հանգամանքների մասին է: Քվեարկությունից հետո քվեատուփերը կկնքվեն եւ կտեղափոխվեն Թբիլիսի: Աֆղանստանում ընտրությունների առաջին փուլի արդյունքներով՝ Զուրաբիշվիլին հավաքել էր 398 ձայն, իսկ Վաշաձեն՝ 261 ձայն, հաղորդել է Sputnik-ը:
