Տնտեսությունների խորքային փոխակերպումներից առաջացած մարտահրավերները պետք է հաղթահարել համատեղ ուժերով. Տիգրան Սարգսյան
Ժամանակակից աշխարհը ոչ միայն արագ փոփոխվում է, այլև օրեցօր դառնում է ավելի փոքր, որովհետև խորանում են հարաբերությունները, փոխազդեցությունները: Հետևաբար, որպեսզի բիզնեսը և մարդիկ իրենց հարմարավետ զգան այս միջավայրում, անհրաժեշտ է ներդաշնակեցնել օրենսդրությունները, որպեսզի մարդիկ չզգան տարբերությունները՝ տեղափոխվելով մեկ երկրից մյուսը:
Այս մասին «Եվրասիական շաբաթ» համաժողովին ասաց Եվրասիական տնտեսական հանձնաժողովի կոլեգիայի նախագահ Տիգրան Սարգսյանը: Նրա խոսքով`ժամանակակից աշխարհում տեխնոլոգիական առաջընթացը և մրցակցությունը մի կողմից, և մյուս կողմից՝ հասարակության ողջ վերակազմավորումը հենց այն հիմնական ուղղություններն են, որոնց միջոցով կարելի է իրագործել երկրների տնտեսությունների առաջընթացը և արդիականացումը:
«Գաղտնիք չէ, որ տնտեսության արդյունաբերականացումը փոխում է ողջ կենսակերպը:Հենց այսպիսի խորքային տեխնոլոգիական փոխակերպումների միջոցով է, որ լուրջ մարտահրավերներ են ի հայտ գալիս, որոնք, մեր համոզմամբ, ավելի լավ է լուծել համատեղ ուժերով»,-ասաց Սարգսյանը:
Նա նշեց, որ համաշխարհային միտումը ցույց է տալիս՝ խոշոր երկրները միայնակ ի վիճակի չեն արձագանքել բոլոր այս մարտահրավերներին:
«Այսինքն, սա համաշխարհային միտում է, և տարածաշրջանային միտումները և տարածաշրջանային տնտեսական միավորումների ստեղծումը մի կողմից պատասխան և արձագանք են այս համաշխարհային մարտահրավերներին, մյուս կողմից՝ հնարավորություն ի հայտ բերելու երկրների ներուժը, որոնք միավորվում են տարբեր կառույցների շրջանակներում»,-նշեց նա:
