«Իրանը դեռևս սպասում է, որ Եվրոպան գործնական միջոցներ կձեռնարկի միջուկային համաձայնագիրը պահպանելու համար». Ռուհանի
Իրանի նախագահ Հասան Ռուհանին հայտարարել է, թե ուրախ է, որ եվրոպական երկրների ղեկավարները հանդես են գալիս Թեհրանի դեմ պատժամիջոցների վերականգնման վերաբերյալ ԱՄՆ-ի որոշման դեմ: Այդ մասին հայտնել է Mehr գործակալությունը:
«Եվրոպան դիմակայում է ԱՄՆ-ի հակաիրանական դիրքորոշմանը, չնայած այն բանին, որ երկար ժամանակ ի վեր Վաշինգտոնի դաշնակիցն է»,- գործակալությունը մեջբերել է Ռուհանիի խոսքը, որը նա ասել է հեռուստատեսությամբ ունեցած ելույթի ժամանակ: Ռուհանին վերստին կոչ է արել եվրոպական երկրների ղեկավարներին՝ ձեռնարկել այնպիսի միջոցներ, որոնք կօգնեն Թեհրանին լրացնել կորուստները ամերիկյան պատժամիջոցների հետ կապված պատժամիջոցներից: Իսլամական Հանրապետության նախագահը հայտարարել է, որ «Իրանը դեռեւս սպասում է, որ Եվրոպան գործնական միջոցներ կձեռնարկի միջուկային համաձայնագիրը պահպանելու համար»:
ԵՄ-ի արտաքին գործերի եւ անվտանգության քաղաքականության գերագույն ներկայացուցիչ Ֆեդերիկա Մոգերինիի եւ Ֆրանսիայի, Մեծ Բրիտանիայի եւ Գերմանիայի արտաքին գործերի նախարարների նախօրյակին հանդես են եկել համատեղ հայտարարությամբ, որում ասված է, որ ԵՄ-ն խորապես ափսոսում է Իրանի դեմ ԱՄՆ-ի պատժամիջոցների վերականգնման համար այն բանից հետո, երբ Վաշինգտոնը որոշեց դուրս գալ իրանական միջուկային ծրագրի վերաբերյալ Գործողությունների համատեղ համապարփակ ծրագրից: Նախարարներն ընդգծել են, որ ԳՀՀԾ-ն «աշխատում է եւ կատարում է իր խնդիրները՝ ապահովելով իրանական միջուկային ծրագրի խաղաղ բնույթը»:
Մինչ այդ ԱՄՆ-ի պետքարտուղար Մայք Փոմպեոն հայտարարել էր, որ Վաշինգտոնը մտադիր է ավելի խիստ պատժամիջոցներ սահմանել Թեհրանի դեմ, քան նրանք, որոնք գոյություն ունեին 2015 թվականին իրանական միջուկային ծրագրի վերաբերյալ միջազգային համաձայնագրի ստորագրումից առաջ: Նա նշել է, որ պատժամիջոցները պատասխան են Իրանի ղեկավարությանը «չարամիտ գործողություններին», եւ որ պատժամիջոցների աղետալի հետեւանքների համար պատասխանատվությունն ընկնում է իրանական կառավարության վրա:
Իրանը եւ միջազգային բանակցորդների «վեցյակը» 2015 թվականի հուլիսի 14-ին համաձայնության են հասել իրանական բազմամյա միջուկային հիմնախնդրի կարգավորման շուրջ: Երկարատեւ բանակցություններն ավարտվել են Գործողությունների համատեղ համապարփակ ծրագրի ընդունմամբ: Այդ ծրագիրը նախատեսում է ավելի վաղ ՄԱԿ-ի ԱԽ-ի, ԱՄՆ-ի եւ Եվրամիության կողմից Իրանի նկատմամբ սահմանված տնտեսական ու ֆինանսական պատժամիջոցների վերացում: Փոխարենը Թեհրանը պարտավորվել է սահմանափակել իր միջուկային գործունեությունը՝ այն դնելով միջազգային հսկողության ներքո, հաղորդել է «Ինտերֆաքս»-ը:
