Սիրիական բանակը մի քանի բնակավայրեր է գրավել երկրի հարավ-արևմուտքում. Al Manar
Սիրիական բանակի ստորաբաժանումները լիակատար հսկողություն են հաստատել Դերաայի նահանգի մի քանի բնակավայրերի նկատմամբ, նահանգ, որը գտնվում է հանրապետության հարավ-արեւմուտքում:
Այդ մասին հունիսի 26-ին հայտնել է Al Manar հեռուստաալիքը։ Նրա տվյալներով՝ վերջերս իրականացված հարձակումն այն խոշոր գործողության բաղկացուցիչ մասն է, որի նպատակը երկրի հարավարեւմտյան շրջանների ազատագրումն է զինյալներից ու զինված ընդդիմությունից:
Գործողության արդյունքում սիրիական բանակը հսկողության տակ է վերցրել Բուսեր Էլ-Հարիր գյուղը, որի շրջանում երկար տարիներ մարտեր էին մղվում, ինչպես նաեւ Մելիհիթ Էլ-Աթաշ գյուղը:
Հեռուստաալիքը նշում է, որ ներկայում կառավարական ուժերը լիակատար հսկողություն են հաստատել Լաջաթ շրջանի նկատմամբ, որը գտնվում է Դերաա եւ Էս-Սուվեյդա հարավային նահանգների սահմանագծին: Այնտեղ գտնվող քարանձավները զինյալները որպես իրենց հենակետեր են օգտագործում եւ այդտեղից զինված հարձակումներ իրականացնում, հաղորդել է ՏԱՍՍ-ը:
