ԵԽ ԽՎ Հայաստանի հարցերով մոնիտորինգի համազեկուցողները հայտարարություն են պատրաստում. Էդմոն Մարուքյան

Եվրախորհրդի Խորհրդարանական վեհաժողովում Հայաստանի հարցերով մոնիտորինգի համազեկուցողները հայտարարություն են պատրաստում հայաստանյան իրադարձությունների վերաբերյալ։ Այս մասին 168.am-ին տեղեկացրեց ՀՀ պատվիրակության կազմում Ստրասբուրգում գտնվող «Ելք» դաշինքի անդամ, «Լուսավոր Հայաստան» կուսակցության ղեկավար Էդմոն Մարուքյանը։

Նա նշեց, որ մոտ 1 ժամից ելույթ է ունենալու ԵԽ ԽՎ նիստում։

«Ես գրանցված եմ ելույթի համար, երևի 1 ժամ դեռ կա, բայց Հայաստանում ամեն րոպե իրադրություն է փոխվում, արդեն Նիկոլ Փաշինյանի տեղը գիտեն, գնացել են մոտը։ Ես ԱԼԴԵ (Եվրոպայի Լիբերալ-դեմոկրատական կուսակցությունների դաշինք.- խմբ.) խմբում զեկուցեցի,  մանրամասն ներկայացրեցի՝ ինչ է տեղի ունեցել, նաև հանդիպել եմ Հայաստանի հարցերով մոնիտորինգի համազեկուցողներից մեկին, և հիմա համազեկուցողները հայտարարություն են պատրաստում։ Ամբողջ տեղեկատվությունը փոխանցել եմ բոլոր գործընկերներին, որ միջամտեն, որպեսզի հնարավորինս որևէ խնդիր չառաջանա, խաղաղ հանգուցալուծում լինի»,- ասաց Է.Մարուքյանը։

Նա նշեց, որ իր ելույթից հետո շտապ վերադառնալու է Հայաստան. «Ուղղակի որոշեցի՝ այստեղ իմ աշխատանքը կատարեմ, միջազգային ճնշում բանեցնենք, որ բռնություններ տեղի չունենան, նոր արյունահեղություն տեղի չունենա և իմ գործընկերներին ու մյուսներին շտապ ազատ արձակեն»։

Հարցին՝ ինչպե՞ս կմեկնաբանի Կարեն Կարապետյանը հայտարարությունը, որ դիմելու է գլխավոր դատախազին, որպեսզի միջնորդությունը պատգամավորների վերաբերյալ Ազգային ժողովից հետ վերցվի, նաև, որ ինքը գնում է Փաշինյանի հետ հանդիպման, արդյո՞ք սա հետքայլ է իշխանության կողմից, և ի՞նչ զիջումների կարող են նրանք գնալ, Է.Մարուքյանը պատասխանեց.

«Չեմ կարող ասել՝ Կարեն Կարապետյանը ինչ է խոսում, որևէ տեղեկություն չունեմ։ Կարծում եմ՝ իշխանությունը փորձում է շարունակել երկխոսությունը։ Քանի որ Սերժ Սարգսյանը չկարողացավ երկխոսել, հիմա Կարեն Կարապետյանն է շարունակում նրա փոխարեն։ Տեսնենք՝ ինչ կլինի, ամեն րոպե փոխվում է իրավիճակը, չեմ կարող ասել՝ ինչ կլինի»։

Անդրադառնալով հետզհետե թափ հավաքող ցույցերին՝ Է.Մարուքյանը նշեց, որ պետք է Նիկոլ Փաշինյանին և մյուս բոլոր ձերբակալվածներին, առևանգված մարդկանց ազատ արձակեն, որից հետո միայն հնարավոր կլինի բողոքի ցույցերը հունի մեջ մտցնել. «Ես այլ տարբերակ չեմ տեսնում»։