«Արսենալ»-ը ջախջախեց ԲԿՄԱ-ին. Մխիթարյանը մասնակցեց խաղին և վնասվածք ստացավ
Ֆուտբոլի Եվրոպայի լիգայի քառորդ եզրափակչի առաջին խաղում Լոնդոնի «Արսենալ»-ը ջախջախեց Մոսկվայի ԲԿՄԱ-ին (4:1):
Հանդիպման մեկնարկից 9 րոպե անց «Արսենալ»-ի կազմում Աարոն Ռեմզին մեկ հպումով գնդակն ուղարկեց ԲԿՄԱ-ի դարպասը: Մոսկովյան ակումբի ֆուտբոլիստներից Ալեքսանդր Գոլովինը հանդիպման 15-րդ րոպեին տուգանային հարվածով վերականգնեց հաշվի հավասարությունը: Բայց արդեն խաղի 23-րդ րոպեին «բանակայինները» սեփական տուգանային հրապարակում Մեսութ Օզիլի դեմ խախտեցին խաղի կանոնները և նշանակված 11 մետրանոց հարվածն անվրեպ իրացեց Լակազետը՝ 2:1: Ընդամենը 5 րոպե անց «զինագործները» խփեցին նաև 3-րդ գնդակը: Օզիլի փոխանցումից հետո անհավանական գոլի հեղինակ դարձավ և դուբլ ձևակերպեց Ռեմզին: Լոնդոնյան ակումբի ֆուտբոլիստները շարունակեցին տիրել նախաձեռնությանը և 34-րդ րոպեին Լակազետը ևս դուբլի հեղինակ դարձավ՝ 4:1:
Հայաստանի ազգայի թիմի ավագ Հենրիխ Մխիթարյանը թիմի մեկնարկային կազմում էր, սակայն վնասվածքի պատճառով փոխարինվեց 60-րդ րոպեին:
Այս թիմերի պատասխան հանդիպումը կկայանա մեկ շաբաթ անց Մոսկվայում:
