«Մենակ ես եմ անփոխարինելի, մնացած բոլորը փոխարինելի են». Վովա Վարդանովը՝ Սերժ Սարգսյանի «անփոխարինելի» լինելու մասին
Առաջին հետախուզադիվերսիոն ջոկատի հրամանատար Վովա Վարդանովը գտնում է՝ պատերազմող երկրի համար գերագույն գլխավոր հրամանատարի անձից ամեն ինչ է կախված:
Հիշեցնենք, որ նոր Սահմանադրությամբ՝ ՀՀ վարչապետն է լինելու գերագույն գլխավոր հրամանատար: ՀՀԿ-ական բազմաթիվ գործիչներ այս օրերին բարձրաձայնում են այն մասին, որ Սերժ Սարգսյանն անվտանգության խնդիրների առումով անփոխարինելի է, և հենց դրա համար նա պետք է լինի ՀՀ վարչապետը:
168.am-ի հետ զրույցում Վ. Վարդանովն ասաց, որ չնայած գերագույն գլխավոր հրամանատարի անձից ամեն ինչ է կախված՝ անփոխարինելի մարդ չկա. «Մենակ ես եմ անփոխարինելի, մնացած բոլորը փոխարինելի են: Ես անփոխարինելի եմ, իհարկե, իմ ընտանիքի համար: Մնացած բոլորը փոխարինելի են՝ լինի դա գլխավոր հրամանատար, լինի գնդի հրամանատար, հրաձիգ և այլն»:
Անդրադառնալով ՀՀԿ-ական գործիչների կողմից Սերժ Սարգսյանի՝ վարչապետ դառնալու վերաբերյալ բերված հիմնավորումներին՝ Վ. Վարդանովն ասաց. «Դե, հիմա, բան է, ասում են մարդիկ, ու մարդիկ կան՝ հավատում են»:
