«Ես վերադարձա իմ արմատներին». Հրայր Թովմասյան
Սահմանադրական դատարանի նախագահ Գագիկ Հարությունյանը ՍԴ անդամներին և աշխատակազմին ներկայացրեց դատարանի նորանշանակ անդամ Հրայր Թովմասյանին:
Գագիկ Հարությունյանը նշեց, որ Սահմանադրական դատարանում սկսվել է սերնդափոխության գործընթաց և գոհունակությամբ ավելացրեց` շատ ուրախ է, որ դատարանից գնացածները կրկին վերադառնում են: «Սահմանադրական դատարանն իր գործառույթները լիարժեք իրականացնելուց և միջազգային մակարդակով շոշափելի ներդրում կատարող ինստիտուտ լինելուց զատ նաև կադրերի լավ դարբնոց է:
Դատարանի նախկին աշխատակիցները լուրջ պաշտոններ են զբաղեցնում` այստեղի փորձառությունը լավագույնս օգտագործելով»,-նշեց Գագիկ Հարությունյանը` հույս հայտնելով, որ Թովմասյանը աշխատանքային նոր լիցք կբերի:
ՍԴ նախագահը Հրայր Թովմասյանին բնութագրեց որպես կայացած իրավաբան և նրան հանձնեց դատավորի զգեստ, որը վերջինս սիրով հագավ և, նկատի ունենալով, որ 22 տարի առաջ սահմանադրական դատարանում աշխատել է որպես առաջատար մասնագետ, ասաց. «Ես վերադարձա իմ արմատներին»:
Լրագրողների հետ զրույցում Հրայր Թովմասյանն Ազգային ժողովում աշխատանքը նմանեցրեց թիմային խաղի, ինչպես ֆուտբոլում և բասկետբոլում է, իսկ ՍԴ-ում աշխատանքը համեմատեց շախմատի հետ` ավելացնելով, որ այն բարդ է ու նուրբ:
«Սա այն վերջին հանգրվանն է, որտեղ պետք է մաքրվի, ֆիլտրվի օրենքը, բացառվի, որ հակասահմանադրական դրույթները կյանքի կոչվեն: Սա զուտ մասնագիտական մի աշխատանք է, որտեղ փորձում ես լուծումներ գտնել մյուս գործընկերներիդ հետ»,-ասաց ՍԴ նորընտիր անդամը:
