Ռիչարդ Միլսը և Իվան Վոլինկինը հեռանում են. «Հրապարակ»
«Հրապարակ» թերթը գրում է. «Հետաքրքիր զուգադիպությամբ` եկող ամսին Հայաստանին հրաժեշտ կտա ոչ միայն ՀՀ-ում ՌԴ դեսպան Իվան Վոլինկինը, այլեւ ԱՄՆ դեսպան Ռիչարդ Միլսը. վերջինիս ժամկետը նույնպես լրանում է: Փաստացի, ԵԱՀԿ ՄԽ համանախագահ երկու երկրները ԵՄ համաձայնագրի ստորագրումից «րոպեներ» անց նոր դեսպաններ կունենան Հայաստանում:
Մեր տեղեկություններով, ԱՄՆ նոր դեսպանի ագրեմանը դեռ չի ուղարկվել ՀՀ ԱԳՆ։ Ով կլինի նա, դեռ չգիտեն կամ չեն ասում. հիշեցնենք` դեսպանի թեկնածությունը հաստատում է Սենատը: Ի դեպ, ԱՄՆ-ն նոր դեսպան ունի նաեւ Ռուսաստանում` մեզ ոչ անհայտ մորմոն Հանթսմանի որդին: Քոչարյանն ավագ Հանթսմանին, հիշեցնենք, Հայաստանում կատարած հումանիտար գործունեության համար պարգեւատրել է «Մեսրոպ Մաշտոց» շքանշանով, իսկ Օսկանյանը «հետապնդվել» է Հանթսմանի «փողերի լվացման» համար:
Ի դեպ, Հանթսման կրտսերը Ռուսաստանում այս պահին «հայտնի» է նրանով, որ «մերժվում» է շատերի կողմից. ռուսաստանյան մեծ ու փոքր կալիբրի չինովնիկները նրա հետ հանդիպումներից խուսափում են»:
Ամբողջությամբ կարող եք կարդալ «Հրապարակ» թերթի այսօրվա համարում:
