«Դա մարդկանց կմղի ապօրինի ծառահատումների». Արծվիկ Մինասյան
«Այս տարվա սեպտեմբերի 17-ին Երևան-Իջևան միջպետական ճանապարհը Տավուշի մարզի բնակիչները շուրջ 3.5 ժամ փակել էին և պահանջ էին ներկայացրել։ Խնդիրը վերաբերում էր անտառահատումներին։ Ինքս ներկա եմ եղել, ծանոթացել եմ խնդրին։ Շուրջ 3.5 ժամ միջպետական ճանապարհը փակելուն զուգահեռ՝ որևէ պետական գերատեսչության ներկայացուցիչ չներկայացավ»,- այսօր ԱԺ-ում կառավարության հետ հարցուպատասխանի ժամանակ այս մասին ասաց «Ծառուկյան» խմբակցության պատգամավոր Վահե Էնֆիաջյանը՝ ընդգծելով, որ դա երկրորդ նման դեպքն էր։
ՀՀ բնապահպանության նախարար Արծվիկ Մինասյանն ասաց, որ հարցը վերաբերում է ապօրինի անտառահատումներին․ «Դժգոհությունը և բողոքը նկատի առնելով՝ վարչապետի մոտ մի քանի անգամ կազմակերպվել է քննարկում։ Այն, ինչ օրինական հատումների տեսքով է, և ինչը սահմանված է թե՛ օրենսդրական ակտերով, թե՛ կառավարության որոշմամբ, գտնվում է կարգավորման նորմալ ընթացքում։ 10 հազար 8 հարյուր դրամը, որ ինքնապատրաստման գինն է՝ անտառից փայտ հանելու ժամանակ, իր մեջ ներառում է նաև ԱԱՀ-ն։ Դրա արժեքը 9 հազար դրամ է։ 4 հազար 9 հարյուր դրամը, ԱԱՀ-ով հանդերձ, վերաբերում է բացառապես «Դիլիջան» ազգային պարկի այն հատվածներին, որոնք ընդամենը որպես անտառում մնացած փայտ կարող են դուրս բերվել։ «Դիլիջան» ազգային պարկն անտառահատման որևէ նորմ չունի, քվոտա չկա այստեղ դրված։ Ինչ վերաբերում է ապօրինի հատումների վերաբերյալ մի շարք բողոքներին, ապա շահագրգիռ անձինք պետք է կանգնեն մեր կողքին, որպեսզի դրանց դեմ նորմալ պայքար գնա։ Այն մարդիկ, որոնք փորձում են օգտագործել այս առիթը և կազմակերպված ձևով մարդկանց հանում են փողոց, մարդկանց փորձում են մղել հակաօրինական գործողությունը նորմ դարձնելուն, մենք պետք է այդ մարդկանց դեմ պայքարենք»։
Նախարարը նշեց, որ զուգահեռաբար իրականացվում են բացատրական աշխատանքներ, «Դիլիջան» ազգային պարկում ուժեղացվել է հսկողությունը․ «Մենք ներկայումս բանակցությունների մեջ ենք դրամաշնորհային մի շարք ծրագրերի հետ, որպեսզի անտառամերձ համայնքներում սոցիալ-տնտեսական ծրագրերի միջոցով մեղմենք ճնշումն անտառների վրա»։
Վահե Էնֆիաջյանն էլ նշեց, որ իր ասածը վերաբերում է սահմանված կարգով թույլատրված անտառահատումներին․ «Գումարի հետ կապված կոնկրետ խոստումներ են տրվել, որ պետք է փոփոխություններ իրականացվեն։ Երկրորդ՝ մենք շատ լավ գիտենք, որ Տավուշի մարզն իր առանձնահատկությունն ունի՝ 185 կմ սահմանը պահող մարզ ունենք, որին պետք է առանձնահատուկ ուշադրությամբ վերաբերվենք։ Եվ ամենակարևորը՝ սա մի ընդունեք անձնավորված ձեր հասցեին, բայց շատ լավ հիշում եմ՝ սեպտեմբերի 17-ը կիրակի օր էր, այլ պաշտոնյա չկա՞ր, որ գար, տեղում կանգներ, խնդրին ծանոթանար ու մարդկանց պատասխաներ»։
Մինասյանն էլ հակադարձեց, որ այդ օրը և դրանից հետո կազմակերպված հանդիպումների ժամանակ ներկայացուցիչներ են եղել թե՛ Բնապահպանության նախարարությունից, թե՛ Գյուղատնտեսության նախարարությունից և թե՛ մարզային կառույցներից․ «Ինչ վերաբերում է գնի իջեցմանը, դա նշանակում է, որ մեր քաղաքացիներին սխալ ազդակ ենք հաղորդում, թե փայտի արժեքը շատ ցածր է, ինչը մարդկանց կմղի ապօրինի ծառահատումների»։
