ՀՀ պաշտոնյաներից 45-ն անցած տարի գույքի և եկամուտների հայտարարագրեր չեն ներկայացրել
Հայաստանի պաշտոնյաներից 45-ն անցած տարի գույքի և եկամուտների հայտարարագրեր ընդհանրապես չեն ներկայացրել Բարձրաստիճան պաշտոնատար անձանց էթիկայի հանձնաժողով։ Օրենքով սահմանված ժամկետից ուշ է ներկայացվել 459 հայտարարագիր, իսկ 376 հայտարարագրեր ներկայացվել են սահմանված պահանջների և կարգի խախտմամբ:
Ներկայումս հայտարարատու են հանդիսանում միայն բարձրաստիճան պաշտոնատար անձինք և նրանց հետ փոխկապակցված անձինք (ամուսին, համատեղ ապրող չափահաս և չամուսնացած զավակ, ինչպես նաև համատեղ ապրող ծնող), որոնց թիվը 2016 թ. դեկտեմբերի 31-ի դրությամբ՝ կազմում է համապատասխանաբար՝ 763 և 1027:
Հաշվի առնելով, որ հաջորդ տարվանից հայտարարատուների ցանկի ընդլայնման արդյունքում հայտարարատու պաշտոնատար անձանց թիվն ավելանալու է շուրջ 3 անգամ (չհաշված պաշտոնատար անձանց ընտանիքի կազմի մեջ մտնող անձանց), նախատեսվում է ավելացնել նաև հանձնաժողովի աշխատակիցների քանակը։ Այս մասին որոշման նախագիծ արդարադատության նախարար Դավիթ Հարությունյանը կներկայացնի Կառավարության վաղվա նիստում։
