«Մենք մեր տեսակետը չենք փոխել». Արծվիկ Մինասյանը՝ Սևանի ջրառի օրենքի նախագծի մասին
Այսօր լրագրողները ՀՀ բնապահպանության նախարար Արծվիկ Մինասյանից հետաքրքրվեցին, թե ինչո՞վ էր պայմանավորված, որ Սևանի ջրառի վիճահարույց նախագծի ժամանակ ՀՀ բնապահպանության նախարարությունն ի սկզբանե բացասական եզրակացություն էր տվել, հետո դիրքորոշումը փոխվեց:
Ի պատասխան՝ Ա. Մինասյանը պարզաբանեց, որ որպես Բնապահպանության նախարարություն՝ իրենք չէին կարող Սևանի ջրառի վերաբերյալ ազդեցության տեսակետից չարձանագրել, որ այն կարող է ունենալ բացասական ազդեցություն.
«Սա եղել է, կա և մնալու է: Այլ բան է, երբ մենք խոսում ենք օրենքի ընդունման վերաբերյալ դրված կարծիքի մասին: Այսօրվա օրենսդրությամբ թույլատրվում է, որ կարելի է ջրառ իրականացնել, օրենքի վերաբերյալ մեր տված կարծիքը հետևյալն է եղել, որ, այո, նախատեսված է, սակայն դրա համար անհրաժեշտ է ներկայացնել պատշաճ հիմնավորում, և այդ պատշաճ հիմնավորման վերաբերյալ մեր տված կարծիքը հիմք է հանդիսացել, որպեսզի հետագայում Ջրային տնտեսության պետական կոմիտեն և կառավարության մեր մյուս գործընկերները փոխեին օրենքի նախագիծը և ներկայացնեին այդ հիմնավորումները: Հիմնավորումները ներկայումս կան, ավելին, եղանակային կանխատեսումները և սպասվող երաշտի բարձր հավանականությունը հնարավորություն տալիս են նման որոշում կայացնելու, բայց միևնույն է, մենք շարունակում ենք մեր դիրքորոշումը պահպանել, որ այո, կա բացասական ռիսկի հավանականություն: Մենք մեր տեսակետը չենք փոխել»:
Մանրամասները՝ 168.am-ի տեսանյութում:
